مکہ معاہدہ: حریفوں پر مسلم دنیا کا رعب

مکہ مکرمہ کی مقدس سر زمین پر پاکستان، سعودی عرب اور ترکیہ کے مابین طے پانے والا ”مکہ مشترکہ دفاعی معاہدہ“ اسلامی دنیا کی تاریخ میں ایک شاندار اور تزویراتی موڑ ثابت ہوا ہے جس نے صدیوں کے جمود کو توڑ کر مسلم امہ کو ایک نئی اور پراعتماد قیادت فراہم کر دی ہے۔ یہ تاریخی معاہدہ محض ایک روایتی دفاعی دستاویز نہیں، بلکہ عالمِ اسلام کے تین سب سے طاقتور، بااثر اور اہم ترین ستونوں کا ایسا اتحاد ہے جو مسلم امہ کو جغرافیائی سیاسی تنہائی سے نکال کر عالمی فیصلوں میں کلیدی کردار دینے کی صلاحیت رکھتا ہے۔ اس معاہدے کے تحت طے پانے والی اجتماعی دفاع کی شق کہ تینوں میں سے کسی ایک ملک پر حملہ سب پر حملہ تصور ہو گا، نے خطے میں ایک نئی مسلم قیادت اور طاقتور توازنِ نو کی بنیاد رکھ دی ہے۔ مبصرین اس اتحاد کو ایک طویل المدتی ”مسلم نیٹو“ کے پیش خیمہ کے طور پر دیکھ رہے ہیں جس سے بیرونی طاقتوں پر سکیورٹی کا انحصار ختم ہو گا اور مسلم ممالک اپنے فیصلے خود کرنے میں آزاد ہوں گے۔ ترکیہ کی جدید ڈرون ٹیکنالوجی اور دفاعی صنعت، پاکستان کی ایٹمی صلاحیت و وسیع جنگی تجربہ، اور سعودی عرب کی بے پناہ مالیاتی و سفارتی طاقت مل کر ایک ایسی ناقابلِ تسخیر قوت تشکیل دے رہے ہیں جو اسلامی دنیا کی حفاظت کی ضامن بنے گی۔
امریکی جریدے ”فارن پالیسی“ نے اپنی ایک تفصیلی رپورٹ میں لکھا ہے کہ ”مکہ معاہدہ دراصل واشنگٹن کی مشرقِ وسطیٰ میں گرتی ہوئی ساکھ اور امریکی سکیورٹی چھتری پر عدم اعتماد کا منطقی نتیجہ ہے، جس نے ان تینوں بڑی مسلم طاقتوں کو ایک دوسرے کے قریب آنے پر مجبور کیا“۔ برطانوی اخبار ”دی گارڈین“ نے اپنے اداریے میں تبصرہ کیا ہے کہ ترکیہ کی دفاعی صنعت، سعودی عرب کے مالیاتی وسائل اور پاکستان کی سٹریٹیجک گہرائی کا یہ سنگم عالمی برادری کے لیے ایک نیا پیغام ہے کہ اب مسلم دنیا اپنے دفاع کے لیے مغرب کی محتاج نہیں رہی۔ اسی طرح فرانسیسی خبر رساں ادارے اے ایف پی کے مطابق، یہ معاہدہ ظاہر کرتا ہے کہ انقرہ، ریاض اور اسلام آباد نے ماضی کے تمام اختلافات کو بالائے طاق رکھ کر ایک ایسے کثیر القطبی بلاک کی بنیاد رکھ دی ہے جو آنے والے کئی عشروں تک عالمی سیاست کا رخ متعین کرے گا۔ عرب میڈیا بالخصوص الجزیرہ اور العربیہ نے اسے ایک تاریخی سنگِ میل قرار دیتے ہوئے کہا ہے کہ یہ بلاک مسلم امہ کے حقوق اور تنازعات کو عالمی فورمز پر زیادہ طاقتور انداز میں اٹھانے کے قابل ہو چکا ہے، جس سے اب کمزور مسلم ریاستیں بھی خود کو محفوظ محسوس کریں گی۔
اس تاریخی مسلم اتحاد کے بعد خطے کے روایتی حریفوں اور مخصوص عالمی طاقتوں کے ایوانوں میں ہلچل مچنا فطری ہے، اور ان کی تزویراتی سوچ میں گہری تبدیلیاں آ رہی ہیں۔ بھارت کے لیے یہ معاہدہ ایک بڑا سفارتی اور تزویراتی دھچکا ہے کیونکہ نئی دہلی پچھلے چند برس سے پاکستان کو سفارتی طور پر تنہا کرنے کی کوششوں میں مصروف تھا۔ اب پاکستان کے سعودی عرب اور ترکیہ کے ساتھ اس مضبوط ترین دفاعی بلاک میں شامل ہونے سے بھارت کی وہ تمام سفارتی سرمایہ کاری خطرے میں پڑ گئی ہے۔ نئی دہلی کے مو¿ثر تھنک ٹینک آئی ڈی ایس اے کی رپورٹس اور بھارتی میڈیا کے تبصروں میں اس معاہدے پر تشویش کا اظہار کیا جا رہا ہے، جہاں تجزیہ کاروں کا ماننا ہے کہ اس سے جنوبی ایشیا اور مشرقِ وسطیٰ دونوں جگہ پر پاکستان کا تزویراتی وزن اور سفارتی قد کٹھ کاٹھ بے پناہ بڑھ گیا ہے۔ دوسری جانب مکہ معاہدے سے سب سے زیادہ خطرہ اور اضطراب اسرائیل کے خیمے میں دیکھا جا رہا ہے جو اب تک مشرقِ وسطیٰ کے ممالک کی اندرونی تقسیم اور عسکری کمزوری کا فائدہ اٹھا کر اپنی من مانیاں کرتا رہا ہے۔ اسرائیلی اخبار یروشلم پوسٹ نے خطرے کی گھنٹی بجاتے ہوئے لکھا ”انقرہ کی بڑھتی ہوئی عسکری قوت اور پاکستان کی ایٹمی صلاحیت کا سعودی عرب کے جغرافیائی وزن کے ساتھ یکجا ہونا اسرائیل کے وجود اور اس کے سکیورٹی نظریے کے لیے سب سے بڑا ڈراو¿نا خواب ثابت ہو سکتا ہے۔“
ریاستہائے متحدہ امریکہ کے لیے یہ معاہدہ خطے میں اس کی گرتی ہوئی سکیورٹی اجارہ داری کا منہ بولتا ثبوت ہے اور امریکی تھنک ٹینکس جیسے بروکنگز انسٹی ٹیوشن اب یہ تسلیم کر رہے ہیں کہ واشنگٹن کی مشرقِ وسطیٰ کے حوالے سے غیر متوازن پالیسیوں نے ہی ان ممالک کو اپنے متبادل سکیورٹی انتظامات کرنے پر مجبور کیا ہے۔ امریکہ اس اتحاد کو نظر انداز نہیں کر سکتا کیونکہ یہ تینوں ممالک یعنی ترکیہ بطور نیٹو ممبر، سعودی عرب اور پاکستان بطور اہم امریکی اتحادی، واشنگٹن کے ساتھ بھی تزویراتی تعلقات رکھتے ہیں اس لیے امریکہ اب ان ممالک پر دبا ڈالنے کے بجائے ان کے ساتھ شراکت داری اور توازن برقرار رکھنے کی حکمتِ عملی اپنائے گا، کیونکہ وہ جانتا ہے کہ اس بلاک کو ناراض کرنے سے خطے میں چین اور روس کا اثر و رسوخ مزید بڑھ سکتا ہے۔ جب یہ تینوں قوتیں ایک ساتھ کھڑی ہوتی ہیں، تو مسلم امہ کا ایک ایسا مضبوط قلعہ تعمیر ہوتا ہے جس کی طرف کوئی بھی حریف میلی آنکھ سے دیکھنے کی جرا¿ت نہیں کر سکتا۔ یہ اتحاد کسی دوسرے کے خلاف جارحیت کے لیے نہیں، بلکہ مسلم دنیا کے حقوق کے تحفظ، اپنی سرحدوں کی حفاظت، اور عالمی سطح پر مسلمانوں کی آواز کو بااثر بنانے کا ایک مثبت، پرامن اور تاریخی اقدام ہے۔ مکہ دفاعی معاہدہ تاریخ کے اوراق پر ایک نئے دور کا آغاز ہے جس نے مسلم امہ کو مایوسی کے اندھیروں سے نکال کر امید اور خود اعتمادی کی نئی راہ دکھائی ہے۔