عالمی تجارتی بحران کا حل: برطانیہ اور امریکہ کا آبنائے ہرمز کھولنے کے لیے  منصوبے پر اتفاق

لندن / واشنگٹن: برطانوی وزیراعظم کیئر اسٹارمر اور امریکی صدر کے درمیان ہونے والے ہنگامی ٹیلیفونک رابطے نے آبنائے ہرمز کے تنازع کو حل کرنے کی نئی امید پیدا کر دی ہے۔ ڈاؤننگ اسٹریٹ کے مطابق، دونوں رہنماؤں نے تزویراتی (Strategic) اور لاجسٹک امور پر اتفاق کرتے ہوئے مسئلے کے حل کے لیے 'فیصلہ کن مرحلے' میں داخل ہونے کا اعلان کیا ہے۔
برطانوی وزیراعظم نے گفتگو کے دوران واضح کیا کہ برطانیہ صرف بیان بازی تک محدود نہیں بلکہ خلیجی ممالک اور فوجی ماہرین کے ساتھ مل کر ایک عملی ایکشن پلان تیار کر چکا ہے۔ انہوں نے امریکی صدر کو اس سفارتی مشن میں ہونے والی اب تک کی پیش رفت سے آگاہ کیا اور اس بات پر زور دیا کہ بین الاقوامی پانیوں میں جہاز رانی کی آزادی پر کوئی سمجھوتہ نہیں کیا جائے گا۔
رپورٹ کے مطابق دونوں رہنماؤں نے اس بات پر اتفاق کیا کہ     آبنائے ہرمز کی بندش سے پیدا ہونے والے خطرات کا مقابلہ مشترکہ فوجی و لاجسٹک حکمت عملی سے کیا جائے گا۔    برطانیہ اپنے شراکت دار ممالک کو ایک ایسے منصوبے پر متحد کر رہا ہے جو نہ صرف دفاعی طور پر مضبوط ہو بلکہ تجارتی لحاظ سے بھی قابلِ عمل ہو۔
ڈاؤننگ اسٹریٹ کا کہنا ہے کہ یہ رابطہ محض رسمی نہیں تھا بلکہ اس میں بحری جہازوں کی فوری بحالی کے لیے عملی اور مؤثر طریقہ کار وضع کرنے پر زور دیا گیا۔ دونوں رہنماؤں نے اس عزم کا اظہار کیا کہ وہ بہت جلد دوبارہ رابطہ کریں گے تاکہ اس منصوبے کو حتمی شکل دی جا سکے۔