کیلیفورنیا: اوپن اے آئی نے چیٹ جی پی ٹی میں ان فیچرز کو عارضی طور پر بند کر دیا ہے جنہوں نے صارفین کو اشتہارات کا تاثر دیا تھا۔ کمپنی کا کہنا ہے کہ یہ فیچرز کسی قسم کے اشتہارات یا پروموشنز کا حصہ نہیں تھے، بلکہ نئے چیٹ جی پی ٹی ایپ پلیٹ فارم پر بنائی گئی ایپس کی نمائش کا ایک تجربہ تھے۔ تاہم، صارفین کی جانب سے ان فیچرز پر شدید تنقید کے بعد انہیں معطل کرنے کا فیصلہ کیا گیا۔
چیف ریسرچ آفیسر مارک چن نے اعتراف کیا کہ ان پروموشنل طرز کی تجاویز نے صارفین کو الجھن میں ڈال دیا۔ سوشل میڈیا پر متعدد صارفین نے ان پیغامات کے اسکرین شاٹس شیئر کیے اور ان کا کہنا تھا کہ یہ اشتہارات کی مانند نظر آ رہے ہیں۔
اوپن اے آئی نے وضاحت کی کہ یہ پیغامات کسی قسم کی ادائیگی کی پروموشنز نہیں تھیں، بلکہ یہ چیٹ جی پی ٹی کے نئے ایپ پلیٹ فارم پر مختلف ایپس کو پیش کرنے کا ایک تجربہ تھا۔ چیٹ جی پی ٹی پلس کے صارفین نے ان پیغامات کو غیر متعلقہ سوالات پر بعض برانڈز کی تشہیر کے طور پر دیکھا، جس سے صارفین میں مایوسی پھیل گئی۔
چیٹ جی پی ٹی کے سربراہ نک ٹرلی نے اس بات کو دہراتے ہوئے کہا کہ کمپنی فی الحال اشتہارات کا کوئی تجربہ نہیں کر رہی اور اگر کبھی ایسا کیا گیا، تو یہ صارفین کے اعتماد کو مدنظر رکھتے ہوئے انتہائی احتیاط کے ساتھ کیا جائے گا۔