اسلام آباد: انڈونیشیا کے صدر پرابووو سوبیانتو اپنے اعلیٰ سطح کے وفد کے ہمراہ پاکستان کے دو روزہ دورے پر اسلام آباد پہنچ گئے ہیں۔ یہ دورہ خاص اہمیت کا حامل ہے کیونکہ اس سال پاکستان اور انڈونیشیا کے درمیان سفارتی تعلقات کے قیام کی 75 ویں سالگرہ منائی جا رہی ہے۔ اس موقع پر صدر سوبیانتو کا اسلام آباد کا یہ پہلا دورہ ہے۔
اسلام آباد پہنچنے پر انڈونیشیا کے صدر کا استقبال پاکستان کے صدر آصف علی زرداری اور وزیرِاعظم شہباز شریف نے کیا۔ دورے کے دوران صدر سوبیانتو وزیرِاعظم سے وفود کی سطح پر اہم مذاکرات کریں گے، جن میں دونوں ممالک کے درمیان تجارت، سرمایہ کاری، دفاع، موسمیاتی تبدیلی، صحت، آئی ٹی، تعلیم اور ثقافت جیسے شعبوں میں تعاون بڑھانے پر گفتگو ہوگی۔
دورے کے دوران صدر سوبیانتو کی ملاقاتیں پاکستان کے صدر، وزیرِاعظم اور چیف آف آرمی اسٹاف جنرل سید عاصم منیر سے بھی متوقع ہیں۔ دونوں ممالک کے درمیان دفاعی اور اقتصادی تعلقات کو مزید مستحکم کرنے کے لیے مذاکرات کیے جائیں گے۔
دفتر خارجہ کے ترجمان کے مطابق، اس دورے کے دوران دونوں ممالک کے درمیان مختلف مفاہمتی یادداشتوں (MoUs) پر دستخط کا امکان ہے، جو دونوں ممالک کے درمیان شراکت داری کو مزید گہرا کریں گے۔