خلیجی تنازع: صدر زرداری کا جنگ بندی کا خیرمقدم، امن دشمنوں سے خبردار رہنے کی ہدایت

اسلام آباد : صدرِ مملکت آصف علی زرداری نے خلیجی خطے میں کشیدگی کے خاتمے اور جنگ بندی کے فیصلے کی تائید کرتے ہوئے اسے عالمی امن کے لیے ایک بڑی پیش رفت قرار دیا ہے۔ صدر نے عالمی برادری اور متعلقہ فریقین پر زور دیا ہے کہ وہ اس موقع کو ضائع نہ کریں اور مستقل امن کے حصول کے لیے کوششیں تیز کریں۔
صدر زرداری نے اپنے خصوصی بیان میں کہا کہ جنگ بندی کا فیصلہ ایک انتہائی بروقت قدم ہے، جس سے خطے میں مکالمے، باہمی تحمل اور ایک مستحکم ماحول کی راہ ہموار ہوگی۔ انہوں نے متنبہ کیا کہ  امن کے دشمن اس عمل کو نقصان پہنچانے کی کوشش کر سکتے ہیں، لہٰذا تمام فریقین کو تخریب کاروں سے ہوشیار رہتے ہوئے پائیدار امن کی راہ پر ثابت قدم رہنا ہوگا۔
پاکستان کے کردار پر روشنی ڈالتے ہوئے صدر کا کہنا تھا کہ ہم نے ہمیشہ انسانیت کے وسیع تر مفاد میں کام کیا ہے۔ انہوں نے یاد دلایا کہ جب دنیا ایک بڑے جنگی المیے کے دہانے پر کھڑی تھی، پاکستان نے نیک نیتی کے ساتھ سفارتی محاذ پر کشیدگی کم کرنے کے لیے اپنا بھرپور حصہ ڈالا۔
خبر کے مطابق صدر نے امن کو معیشت سے جوڑتے ہوئے درج ذیل نکات پر زور دیا  پائیدار امن کے بغیر خطے میں معاشی استحکام ممکن نہیں۔خطے کے عوام کی خوشحالی باہمی رابطوں اور پرامن بقائے باہمی میں پنہاں ہے۔ جنگ بندی سے پیدا ہونے والی گنجائش کو طویل مدتی حل کے لیے استعمال کیا جانا چاہیے۔صدرِ مملکت نے امید ظاہر کی کہ یہ پیش رفت پورے خطے کے لیے ترقی اور خوشحالی کا پیش خیمہ ثابت ہوگی۔