غزہ : لبنان کے شمال، مشرق اور جنوب میں اسرائیلی طیاروں نے کئی جگہوں پر فضائی حملے کیے ہیں۔ بعلبک کے قریب بودای کے پہاڑی علاقے اور شمالی لبنان کے عکار ضلع میں کفرملکی کو نشانہ بنایا گیا۔ جنوبی لبنان کے متعدد دیہات جیسے عین قانا، صربا اور حومین الفوقا بھی ان حملوں کی زد میں آئے۔
اسرائیلی فوج کے ترجمان نے دعویٰ کیا ہے کہ یہ حملے حزب اللہ کے عسکری ٹھکانوں اور اسلحہ ذخیرہ کرنے والی جگہوں کو تباہ کرنے کے لیے کیے گئے ہیں۔
یہ فضائی حملے ایسے وقت پر ہوئے ہیں جب لبنان اور اسرائیل کے درمیان نومبر میں جنگ بندی کا معاہدہ طے پایا تھا، مگر اسرائیل نے اب تک جنوب لبنان میں اپنی فوجی موجودگی برقرار رکھی ہوئی ہے۔ لبنان بارہا مطالبہ کر چکا ہے کہ اسرائیلی فوج ان علاقوں سے واپس چلی جائے۔
ادھر حزب اللہ نے واضح کر دیا ہے کہ اسرائیل کے انخلا تک وہ اپنے ہتھیار نہیں ڈالے گا۔ امریکہ کے ایک خاص ایلچی آج بیروت پہنچ رہے ہیں تاکہ خطے کی صورت حال پر بات چیت کی جا سکے۔
لبنانی وزیراعظم نے بھی بتایا ہے کہ اسرائیل نے جنگ بندی کی خلاف ورزیاں بہت بار کی ہیں، جو خطے کی سلامتی کے لیے خطرہ ہے۔