لاہور:وفاقی وزیر اطلاعات عطا تارڑ نے تحریک انصاف اور اس کے بانی پر سخت نکتہ چینی کرتے ہوئے کہا ہے کہ بانی پی ٹی آئی ذہنی مریض ہیں اور پارٹی دشمن عناصر کے آلہ کار بن چکے ہیں۔ انہوں نے الزام عائد کیا کہ پی ٹی آئی کے سوشل میڈیا اکاؤنٹس ریاستی اداروں کے خلاف گمراہ کن پروپیگنڈے میں ملوث ہیں اور بانی کی بہنیں بھارتی میڈیا پر پاکستان اور فوج کے خلاف بیانات دیتی ہیں۔
وزیر اطلاعات نے کہا کہ خیبرپختونخوا میں 12 سال سے تحریک انصاف کی حکومت رہی مگر کوئی بنیادی ترقیاتی منصوبہ یا اسپتال قائم نہیں کیا گیا، اور حکومت کشمیر و فلسطین کے مسائل کو پس پشت ڈال گئی۔
عطا تارڑ نے کہا کہ پاکستان کی دفاعی قوت فیلڈ مارشل سید عاصم منیر کی قیادت میں مضبوط رہی اور بھارت کے سات طیارے مار گرائے گئے، جبکہ تحریک انصاف کی حکومت نے بھارت کے خلاف کوئی مؤثر موقف نہیں اپنایا۔
انہوں نے مسلم لیگ ن کی کارکردگی کو اجاگر کرتے ہوئے کہا کہ پنجاب میں فرانزک لیب اور دیگر بڑے منصوبے مکمل کیے گئے، ملک کے ہر بڑے منصوبے پر نواز شریف کی تختی لگی ہوئی ہے، اور انتخابی وعدے عوام کی خدمت کے لیے پورے کیے جا رہے ہیں۔ عطا تارڑ نے الزام لگایا کہ بانی پی ٹی آئی نے جیل میں 190 ملین پاؤنڈ کی میگا کرپشن کی اور اسپتال و فلاحی منصوبوں کے فنڈز میں بدعنوانی کی گئی۔
وزیر اطلاعات نے زور دیا کہ پاکستان کی ترقی اور عوامی خدمت مسلم لیگ ن کی اولین ترجیح ہے اور حکومت منصوبوں پر مسلسل کام کر رہی ہے۔