لاہور: پنجاب ڈیزاسٹر مینجمنٹ اتھارٹی (پی ڈی ایم اے) نے مون سون سیلاب کی تازہ ترین صورتحال پر تفصیلی رپورٹ جاری کی ہے۔ رپورٹ کے مطابق گزشتہ 24 گھنٹوں کے دوران گجرات میں 86 ملی میٹر، نارووال میں 37 ملی میٹر اور ملتان میں 28 ملی میٹر بارش ریکارڈ کی گئی۔
اسی عرصے میں ڈیرہ غازی خان میں 27 ملی میٹر اور جہلم میں 22 ملی میٹر بارش ہوئی۔ مزید برآں، راولپنڈی، سیالکوٹ، اٹک، منگلا، مری، لیہ، میانوالی اور کوٹ ادو میں بھی بارش ہوئی ہے۔
ڈی جی پی ڈی ایم اے عرفان علی کاٹھیا نے بتایا ہے کہ آئندہ 24 گھنٹوں کے دوران پنجاب کے بیشتر اضلاع میں بارش کا امکان ہے اور بارشوں کا چھٹا سلسلہ کل (جمعرات) تک جاری رہ سکتا ہے۔ انہوں نے انتظامیہ کو چوکس رہنے کی ہدایت دی ہے۔
دریائے سندھ کے تربیلا مقام پر کم سطح کا سیلاب پایا جا رہا ہے جبکہ کالاباغ، چشمہ اور تونسہ کے علاقوں میں پانی کا بہاؤ معمول کے مطابق ہے۔ دریائے چناب، جہلم، راوی اور ستلج میں بھی پانی کی سطح مستحکم ہے۔ تربیلا ڈیم 95 فیصد اور منگلا ڈیم 62 فیصد بھر چکے ہیں، جب کہ بھارتی ڈیمز میں پانی کی سطح 56 فیصد تک جا پہنچی ہے۔
بارشوں اور سیلاب کے باعث اب تک 164 افراد اپنی جانیں گنوا چکے ہیں، جبکہ گزشتہ 24 گھنٹوں کے دوران 3 افراد زخمی ہوئے ہیں۔
حکام نے عوام سے اپیل کی ہے کہ وہ حفاظتی تدابیر اختیار کریں اور خطرناک علاقوں سے دور رہیں تاکہ جان و مال کا تحفظ یقینی بنایا جا سکے۔