لاہور: 6 ستمبر 1965 کی جنگ میں لاہور کا محاذ بھارتی فوج کے لیے اہم ہدف تھا، تاہم پاک فوج نے بھرپور مزاحمت کرتے ہوئے دشمن کی پیش قدمی کو روک دیا۔ لاہور کے مشرق میں واقع بی آر بی کینال نے اس دفاعی جنگ میں اہم رکاوٹ کا کردار ادا کیا۔
بھارتی فوج نے بی آر بی کینال عبور کرکے لاہور کی جانب بڑھنے کی کوشش کی، مگر پاکستانی جوانوں نے مختلف مقامات پر ڈٹ کر مقابلہ کیا اور دشمن کو آگے بڑھنے سے روک دیا۔
بی آر بی کینال کے محاذ پر پاک فوج کے جوانوں نے جرات، بہادری اور غیر معمولی عزم کا مظاہرہ کیا۔ دشمن کے لیے لاہور کے اہم علاقوں تک پہنچنے کا راستہ مزاحمت کے باعث مسدود ہوگیا۔
سرحدی علاقوں کے شہریوں کے مطابق 6 ستمبر 1965 کو فوج کے ساتھ عوام نے بھی دفاعِ وطن کے جذبے کا مظاہرہ کیا اور دشمن کے مقابلے میں متحد رہے۔
یوں بی آر بی کینال 1965 کی جنگ میں لاہور کے دفاع کی ایک اہم علامت بن گئی، جو پاک فوج کی مزاحمت اور قوم کے عزم کی یاد دلاتی ہے۔