امریکی حریف کو دھول چٹاکر پاکستانی سٹار شاہزیب رند نے عالمی فائٹ جیت لی

کوئٹہ: پاکستان کے مکسڈ مارشل آرٹس (MMA) فائٹر شاہزیب رند نے امریکہ میں منعقدہ بڑے مقابلے میں تاریخی فتح حاصل کر کے دنیا کو اپنی صلاحیتوں کا گرویدہ بنا لیا۔
لائٹ ویٹ کیٹیگری کے اس اہم مقابلے میں شاہزیب رند کا مقابلہ تجربہ کار امریکی فائٹر آندرے ایول سے تھا۔ شاہزیب رند نے پہلے ہی منٹ سے حریف پر دباؤ برقرار رکھا اور اپنی تیز رفتار تکنیک کا بھرپور استعمال کیا۔
میچ کے دوسرے ہی راؤنڈ میں پاکستانی شاہین نے فیصلہ کن وار کرتے ہوئے آندرے ایول کو ناک آؤٹ کر دیا۔ ریفری کے اعلان کے ساتھ ہی شاہزیب رند نے رنگ میں پاکستان کا جھنڈا بلند کر دیا، جس پر وہاں موجود شائقین نے کھڑے ہو کر انہیں داد دی۔
کوئٹہ سے تعلق رکھنے والے شاہزیب رند کی اس کامیابی کو پاکستان کے لیے ایک بڑا اعزاز قرار دیا جا رہا ہے۔ اس فتح نے نہ صرف عالمی رینکنگ میں شاہزیب کی پوزیشن مستحکم کی ہے بلکہ یہ پیغام بھی دیا ہے کہ پاکستانی ٹیلنٹ دنیا کے کسی بھی کونے میں ملک کا نام روشن کرنے کی بھرپور اہلیت رکھتا ہے۔