اسلام آباد : مقبول سوشل میڈیا پلیٹ فارم انسٹاگرام نے اپنے لائیو ویڈیو فیچر کی رسائی کو محدود کرتے ہوئے ایک اہم فیصلہ کر لیا ہے، جس کے مطابق اب صرف وہی صارفین لائیو براڈکاسٹ کر سکیں گے جن کے فالوورز کی تعداد 1,000 یا اس سے زائد ہو گی۔
پہلے یہ فیچر تمام انسٹاگرام صارفین کے لیے دستیاب تھا، لیکن اب کروڑوں صارفین، جن کے فالوورز ایک ہزار سے کم ہیں، اس سہولت سے محروم ہو جائیں گے۔
انسٹاگرام کی مالک کمپنی میٹا نے اس تبدیلی کی تصدیق کرتے ہوئے بتایا کہ اس اقدام کا مقصد پلیٹ فارم پر لائیو براڈکاسٹ کے معیار کو بہتر بنانا اور صارفین کو مزید مؤثر تجربہ فراہم کرنا ہے۔
رپورٹس کے مطابق، حالیہ دنوں میں کئی صارفین کو لائیو جانے میں دشواری کا سامنا تھا، اور انہیں ایک پیغام موصول ہو رہا تھا جس میں نئے تقاضوں کی وضاحت کی گئی تھی۔ پیغام میں کہا گیا کہ اب صرف وہ پبلک اکاؤنٹس جن کے فالوورز 1,000 یا اس سے زیادہ ہیں، لائیو ویڈیوز چلا سکیں گے۔
میٹا نے مزید وضاحت کرتے ہوئے کہا ہے کہ یہ نئی پالیسی جلد ہی نجی (پرائیویٹ) اکاؤنٹس پر بھی لاگو کی جائے گی، تاہم اس وقت اسے مرحلہ وار نافذ کیا جا رہا ہے، اسی لیے فی الحال صرف پبلک اکاؤنٹس پر اس کا اطلاق ہو رہا ہے۔
یہ تبدیلی انسٹاگرام کی اس خصوصیت کو بھی متاثر کرے گی جو 2024 میں متعارف ہوئی تھی، جس کے ذریعے صارفین صرف مخصوص دوستوں کے ساتھ نجی لائیو سیشن منعقد کر سکتے تھے۔
ماہرین کا کہنا ہے کہ یہ قدم انسٹاگرام کو زیادہ پیشہ ورانہ اور محفوظ پلیٹ فارم بنانے کی ایک کوشش ہو سکتا ہے، اگرچہ کمپنی نے 1,000 سے کم فالوورز والے اکاؤنٹس کو اس فیچر سے محروم کرنے کی واضح وجہ بیان نہیں کی۔