اسلام آباد: وفاقی دارالحکومت میں پارلیمنٹ لاجز کا 13 برس سے زیر تکمیل نیا بلاک اب مکمل ہونے کے قریب پہنچ گیا ہے۔ وفاقی وزیر داخلہ محسن نقوی نے پارلیمنٹ لاجز کے اس نئے بلاک کا دورہ کیا اور وہاں جاری ترقیاتی کاموں کا جائزہ لیا۔
وزیر داخلہ نے اس منصوبے کی جلد اور معیاری تکمیل کی ہدایت دیتے ہوئے کہا کہ یہ ہر صورت مکمل ہونا چاہیے۔ اس کے لیے انہوں نے تین شفٹوں میں کام کرنے کی ہدایت بھی جاری کی تاکہ اس کی تکمیل میں مزید تاخیر نہ ہو۔
محسن نقوی نے کہا کہ یہ منصوبہ 2012 سے رکا ہوا تھا، اور اس کی تکمیل کے بعد پارلیمنٹرینز کو رہائش کی بہتر سہولتیں فراہم ہوں گی۔ انہوں نے مزید کہا کہ پارلیمنٹ لاجز سمیت تمام عوامی فلاحی منصوبوں کو طے شدہ وقت میں مکمل کیا جائے گا تاکہ عوامی وسائل کا بہترین استعمال ہو سکے۔
دورے کے دوران، چیئرمین سی ڈی اے محمد علی رندھاوا نے وزیر داخلہ کو منصوبے کی موجودہ پیش رفت کے بارے میں تفصیلی بریفنگ دی، اور اس موقع پر سی ڈی اے کے دیگر افسران بھی موجود تھے۔