ممبئی: بھارتی گلوکار اریجیت سنگھ کا ایک خاص ریسٹورنٹ مغربی بنگال کے شہر جیا گنج میں واقع ہے، جو نہ صرف لذیذ کھانوں کی وجہ سے مشہور ہے، بلکہ کم قیمت پر کھانا فراہم کرنے کے لیے بھی خاص شہرت رکھتا ہے۔ اس ریسٹورنٹ کا نام 'ہیشل' ہے اور یہ اریجیت کے والد کے زیرِ انتظام چل رہا ہے۔
ریسٹورنٹ میں خاص طور پر وہ افراد جو مالی طور پر کمزور ہیں، جیسے طلباء، مزدور اور بزرگ شہری، انہیں صرف 40 روپے میں غذائیت سے بھرپور کھانا فراہم کیا جاتا ہے۔ یہاں سبزیوں پر مشتمل ایک مکمل تھالی 40 روپے میں ملتی ہے، اور طلباء کے لیے اس کی قیمت مزید کم کر کے 30 روپے رکھی گئی ہے۔
اس ریسٹورنٹ کی سب سے بڑی خاصیت یہ ہے کہ یہ نہ صرف معیاری اور سستا کھانا فراہم کرتا ہے بلکہ اس کا مقصد ان لوگوں کی مدد کرنا ہے جنہیں مناسب قیمت پر اچھا کھانا ملنا مشکل ہوتا ہے۔ اریجیت سنگھ کا یہ اقدام ایک خوبصورت سماجی خدمت کی مثال ہے جو ان کے خاندان نے شروع کیا۔