اسلام آباد:ملک کے اگلے مالیاتی بجٹ کی تیاریوں میں اہم پیشرفت سامنے آئی ہے جہاں بین الاقوامی مالیاتی فنڈ (آئی ایم ایف) کے ساتھ جاری طویل مذاکرات کے باعث وفاقی بجٹ کی تاریخ آگے بڑھنے کا امکان ظاہر کیا جا رہا ہے۔ ذرائع کے مطابق پبلک سیکٹر ڈویلپمنٹ پروگرام (PSDP) اور دیگر بجٹ اہداف پر عالمی مالیاتی ادارے کے ساتھ مشاورت تاحال جاری رہنے کی وجہ سے قومی اسمبلی کے بجٹ اجلاس کا باضابطہ نوٹیفیکیشن اب تک جاری نہیں ہو سکا۔ ایوانِ صدر نے پہلے اجلاس 5 جون کو طلب کرنے کا اشارہ دیا تھا، تاہم اب بجٹ 8 یا 12 جون کو پیش کیے جانے کی قوی امید ہے۔
اس نئی معاشی صورتحال اور فنڈز کی تخصیص پر مشاورت ادھوری ہونے کے باعث قومی اقتصادی کونسل (NEC) کا کل ہونے والا اہم اجلاس بھی فوری طور پر مؤخر کر دیا گیا ہے۔ حکومتی معاشی ٹیم آئی ایم ایف کی شرائط کے مطابق بجٹ دستاویزات کو حتمی شکل دینے میں مصروف ہے، جس کے بعد ہی وفاقی کابینہ اور پارلیمنٹ سے بجٹ کی حتمی منظوری لی جائے گی۔