اسلام آباد: آسٹریلیا ایوارڈز پروگرام کے ذریعے پاکستانی شہریوں کو آسٹریلیا میں ماسٹرز کی ڈگری کے لیے مکمل مالی معاونت فراہم کی جائے گی۔ یہ اسکالرشپس 2027 میں شروع ہونے والے تعلیمی سیشن کے لیے دستیاب ہوں گی۔
اس پروگرام کا مقصد پاکستان میں تعلیمی معیار کو بہتر بنانا، قیادت کی صلاحیتوں کو فروغ دینا، اور دونوں ممالک کے درمیان قریبی تعلقات قائم کرنا ہے۔ امیدواروں کا انتخاب تعلیمی قابلیت، متعلقہ تجربہ اور قائدانہ صلاحیت کی بنیاد پر کیا جائے گا، جبکہ خواتین، معذور افراد اور دیگر کمزور طبقات کو درخواست دینے کی خصوصی ترغیب دی گئی ہے۔
اہم ترجیحی شعبوں میں ماحولیاتی تبدیلی، خواتین و بچیوں کی بااختیاری، زراعت، آبی وسائل کا تحفظ، انفراسٹرکچر اور معاشی ترقی شامل ہیں۔ درخواست دہندگان کا پاکستانی شہری ہونا، پاکستان میں مقیم ہونا، 16 سالہ تعلیم مکمل کرنا اور کم از کم 5 سال کا متعلقہ پیشہ ورانہ تجربہ رکھنا ضروری ہے۔ درخواست دینے والوں کی عمر کی حد 45 سال ہے۔
منتخب امیدواروں کو مکمل فیس، واپسی کے لیے ہوائی ٹکٹ، رہائش، صحت انشورنس، تعارفی تعلیمی پروگرام، اور تحقیقی کام کے لیے الاؤنس فراہم کیا جائے گا۔ اسکالرشپ مکمل کرنے کے بعد منتخب افراد کو کم از کم دو سال پاکستان میں خدمات انجام دینی ہوں گی۔
درخواستیں یکم فروری 2026 سے آن لائن OASIS پورٹل کے ذریعے جمع کروائی جا سکتی ہیں، اور آخری تاریخ 30 اپریل 2026 مقرر کی گئی ہے۔
یہ اسکالرشپ پروگرام پاکستانی پیشہ ور افراد کو عالمی معیار کی تعلیم اور قیادت کے فروغ کے مواقع فراہم کرنے میں مددگار ثابت ہو گا۔