دبئی :آج متحدہ عرب امارات کا 54 واں قومی دن ہے، جو پورے ملک میں بڑے جوش و جذبے سے منایا جا رہا ہے۔ دبئی، ابو ظہبی اور دیگر ریاستوں میں جشن کا سماں ہے، اور آتشبازی، تقریبات اور ثقافتی پروگرامز کے ذریعے اس دن کو خصوصی طور پر یادگار بنایا جا رہا ہے۔ اس موقع پر اماراتی عوام خوشی کا اظہار کر رہے ہیں اور اپنی قوم کی ترقی اور اتحاد کو منانے کے لیے یکجا ہیں۔
پاکستانی کمیونٹی بھی اس خوشی میں شریک ہو رہی ہے اور دبئی کو مزید سرسبز بنانے کے عزم کا اظہار کر رہی ہے، جو کہ دونوں ممالک کے درمیان مضبوط تعلقات کا ایک خوبصورت نمونہ ہے۔
اس دن کے حوالے سے اماراتی حکومت نے سرکاری اور نجی اداروں کے ملازمین کے لیے دو دن کی تعطیل کا اعلان کیا ہے تاکہ وہ اس اہم موقع پر اپنے اہل خانہ کے ساتھ جشن منا سکیں۔
یاد رہے کہ 2 دسمبر 1971 کو متحدہ عرب امارات کا قیام عمل میں آیا تھا، جب ابو ظہبی، دبئی، شارجہ، عجمان، ام القوین، راس الخیمہ اور فجیرہ کی ریاستوں نے اتحاد کیا۔ اس کے بعد سے ہر سال 2 دسمبر کو متحدہ عرب امارات کا قومی دن منایا جاتا ہے تاکہ اس تاریخی اتحاد اور ترقی کی کامیابیوں کو یاد کیا جا سکے۔