راولپنڈی : پاکستان اور چین کی افواج نے خطے میں امن و استحکام کے لیے اپنے عزم کو مزید مستحکم کرنے کے لیے ’’وارئیر-IX‘‘ کے نام سے مشترکہ فوجی مشق کا آغاز کر دیا ہے۔ یہ مشق نیشنل کاؤنٹر ٹیررازم سینٹر پبی میں شروع ہوئی، جس کا مقصد دونوں افواج کے درمیان انسداد دہشت گردی کے شعبے میں تعاون بڑھانا اور جدید جنگی حکمت عملیوں کا تبادلہ کرنا ہے۔
آئی ایس پی آر کے مطابق، یہ مشق دونوں ممالک کی عسکری مہارتوں کو مزید بہتر بنانے اور آپریشنز میں ہم آہنگی بڑھانے کے لیے منعقد کی جا رہی ہے۔ ’’وارئیر-IX‘‘ مشق کا یہ نویں دور ہے اور اس سے پاکستان اور چین کی دفاعی شراکت داری مزید مضبوط ہوگی۔
افتتاحی تقریب میں پاکستان کے منگلا کور کے کمانڈر اور چینی فوج کے ویسٹرن تھیٹر کمانڈ کے ڈپٹی چیف آف سٹاف میجر جنرل بیان شیاؤمنگ نے شرکت کی۔ دونوں افواج کے سینئر افسران نے اس موقع پر مشق کے اہمیت پر زور دیا، جو دونوں ممالک کے درمیان دفاعی تعلقات کو مستحکم کرنے اور دہشت گردی کے خطرات کے خلاف مشترکہ حکمت عملیوں کو مزید فروغ دینے کی غرض سے کی جا رہی ہے۔