لاہور : پاکستانی ٹی وی میزبان اور سوشل میڈیا انفلوئنسر متھیرا نے کہا ہے کہ معاشرے میں مردوں سے ہر وقت مضبوط رہنے کی توقع کی جاتی ہے، جس کے باعث وہ اپنے جذبات چھپا لیتے ہیں۔
ایک انٹرویو کے دوران متھیرا کا کہنا تھا کہ لڑکوں کی ایسی تربیت ہونی چاہیے جس میں انہیں اپنے احساسات کا اظہار کرنے کی آزادی دی جائے۔ انہوں نے کہا کہ والدین اور شریکِ حیات مردوں کی ذہنی اور جذباتی کیفیت کو سمجھنے میں اہم کردار ادا کر سکتے ہیں۔
متھیرا کے مطابق مسلسل ذمہ داریوں اور معاشرتی دباؤ کی وجہ سے بہت سے مرد ذہنی تھکن کا شکار ہو جاتے ہیں، جس کے اثرات ان کی ذاتی اور خاندانی زندگی پر بھی پڑتے ہیں۔
انہوں نے مزید کہا کہ اگر بچپن سے لڑکوں کو یہ سکھایا جائے کہ اداسی یا ذہنی دباؤ کا سامنا کرنا کمزوری نہیں بلکہ ایک فطری انسانی کیفیت ہے، تو معاشرے میں مردوں کی ذہنی صحت سے متعلق رویوں میں مثبت تبدیلی آ سکتی ہے۔