اقوام متحدہ بی ایل اے کے خلاف مؤثر اقدامات کرے، سینیٹر ثمینہ ممتاز زہری

اسلام آباد:سینیٹر ثمینہ ممتاز زہری نے کہا ہے کہ کالعدم بلوچ لبریشن آرمی (بی ایل اے) کو اقوامِ متحدہ کی دہشت گرد تنظیموں کی فہرست میں شامل کرنا وقت کی اہم ضرورت ہے،اقوام متحدہ بی ایل اے کے خلاف مؤثر اقدامات کرے، تاکہ اس کے مالی وسائل، نقل و حرکت اور دہشت گرد سرگرمیوں پر مؤثر قدغن لگائی جا سکے۔
انہوں نے  مؤقف اختیار کیا کہ بی ایل اے بلوچستان کے عوام کی نمائندہ تنظیم نہیں بلکہ صوبے میں موجود غربت، پسماندگی اور بے روزگاری جیسے مسائل کا فائدہ اٹھا کر نوجوانوں کو شدت پسندی کی  طرف راغب کرتی ہے۔ ان کے مطابق اس تنظیم کی کارروائیاں نہ صرف بلوچستان بلکہ پورے خطے کے امن، استحکام اور ترقی کے لیے خطرہ بن چکی ہیں۔
سینیٹر ثمینہ ممتاز زہری نے کہا کہ بلوچستان میں دہشت گرد حملوں میں مسلسل اضافہ دیکھنے میں آ رہا ہے، جبکہ جعفر ایکسپریس پر حملہ اس خطرے کی شدت کا واضح ثبوت ہے۔ ان کا کہنا تھا کہ ایسے حملوں سے قیمتی انسانی جانوں کے ضیاع کے ساتھ ساتھ اہم ترقیاتی منصوبے، مواصلاتی نظام اور سرمایہ کاری بھی متاثر ہوتی ہے۔
انہوں نے کہا کہ اگرچہ امریکہ، برطانیہ اور آسٹریلیا بی ایل اے کو دہشت گرد تنظیم قرار دے چکے ہیں، تاہم اقوامِ متحدہ کی سطح پر بھی اس کے خلاف مؤثر اور مربوط کارروائی کی ضرورت ہے تاکہ عالمی سطح پر دہشت گردی کے خلاف کوششوں کو مزید مضبوط بنایا جا سکے۔
انہوں نے   زور دیا کہ دہشت گردی کے خاتمے کے لیے سکیورٹی اقدامات کے ساتھ بلوچستان میں بہتر حکمرانی، معاشی ترقی، سیاسی شمولیت اور عوامی مسائل کے حل پر یکساں توجہ دینا ضروری ہے تاکہ پائیدار امن اور استحکام کو یقینی بنایا جا سکے۔