کیلیفورنیا: ایپل آئی فون 18 پرو اور پرو میکس میں ایک نیا فیچر متعارف کرانے کا منصوبہ بنا رہا ہے جس کے تحت صارفین سیٹلائیٹ کے ذریعے براہ راست کال کر سکیں گے۔ دی انفارمیشن کی رپورٹ کے مطابق، اس فیچر کو فراہم کرنے کے لیے ایپل اسپیس ایکس کے اسٹار لنک سیٹلائیٹ نیٹ ورک سے تعاون کر رہا ہے۔
اب تک آئی فونز میں سیٹلائیٹ کے ذریعے ایمرجنسی میسجنگ کی سہولت موجود ہے، جو اس وقت دستیاب ہے جب سیلولر یا انٹرنیٹ سروسز دستیاب نہیں ہوتیں۔ لیکن ایپل اس فیچر کو مزید آگے بڑھانے پر کام کر رہا ہے تاکہ آئی فون 18 پرو کے صارفین کو سیٹلائیٹ کے ذریعے براہ راست کال کرنے کی سہولت مل سکے۔
ایپل اس فیچر کے لیے کسی اضافی ہارڈویئر کی ضرورت نہیں ہوگی، اور یہ فیچر آئی فون 18 پرو ماڈلز میں خودکار طور پر فعال ہو جائے گا۔ اسپیس ایکس سے مذاکرات کے ذریعے ایپل اس فیچر کو زیادہ مستحکم اور وسیع پیمانے پر دستیاب کرنے کی کوشش کر رہا ہے۔
اس کے علاوہ، ایپل کی جانب سے ایک نئے اے پی آئی پر بھی کام کیا جا رہا ہے جس سے ایپ ڈویلپرز اپنی ایپس میں سیٹلائیٹ کنیکٹیویٹی شامل کر سکیں گے۔ ایپل میپس کے ایک نئے ورژن پر بھی کام ہو رہا ہے، جو سیلولر یا وائی فائی کنکشن کے بغیر بھی نیویگیشن فراہم کرے گا۔ایپل نے اس فیچر کی تفصیلات پر ابھی تک کوئی رسمی بیان جاری نہیں کیا، لیکن توقع ہے کہ یہ فیچر ستمبر 2026 میں آئی فون 18 سیریز کے متعارف ہونے کے وقت صارفین کو دستیاب ہوگا۔