کیلیفورنیا : واٹس ایپ نے اپنے صارفین کی پرائیویسی اور سکیورٹی کو مزید مضبوط کرنے کے لیے ایک نیا فیچر متعارف کرایا ہے، جس کا نام ’’اسٹرکٹ اکاؤنٹ سیٹنگز‘‘ رکھا گیا ہے۔ یہ فیچر خاص طور پر ایسے افراد کے لیے بنایا گیا ہے جو سائبر حملوں، اسپائی ویئر یا دیگر ڈیجیٹل خطرات کا زیادہ سامنا کرتے ہیں، جیسے صحافی، عوامی شخصیات اور آن لائن انفلوئنسرز۔
اس نئے فیچر کو فعال کرنے پر، واٹس ایپ خودکار طور پر آپ کے اکاؤنٹ میں سخت پرائیویسی کنٹرولز لگا دیتا ہے۔ اس کے تحت نامعلوم نمبروں سے بھیجی جانے والی میڈیا فائلز اور اٹیچمنٹس خود بخود بلاک ہو جاتی ہیں، جس سے ممکنہ خطرات اور نقصان کو کم کیا جا سکتا ہے۔
اس فیچر کے فعال ہونے کے بعد، آپ کا اکاؤنٹ ’’لاک ڈاؤن موڈ‘‘ میں چلا جاتا ہے، جس سے کچھ فنکشنز محدود ہو جاتے ہیں، مگر مجموعی طور پر آپ کو زیادہ محفوظ تجربہ ملتا ہے۔ صارفین اس فیچر کو واٹس ایپ کی سیٹنگز میں جا کر آسانی سے فعال کر سکتے ہیں: Settings → Privacy → Advanced۔
کمپنی نے یہ بھی بتایا کہ یہ فیچر مرحلہ وار رول آؤٹ کیا جائے گا اور آنے والے ہفتوں میں دنیا بھر کے صارفین کو دستیاب ہو جائے گا۔ اس کے علاوہ، واٹس ایپ نے اپنے سیکیورٹی سسٹم کو مزید مضبوط بنایا ہے اور ایپ کے اندر اہم کوڈز کو Rust پروگرامنگ لینگویج میں تبدیل کیا ہے تاکہ تصاویر، ویڈیوز اور میسجز کو بہتر اور محفوظ طریقے سے پروسیس کیا جا سکے۔
یہ فیچر واٹس ایپ کے صارفین کو خاص طور پر اس بات کا احساس دلاتا ہے کہ ان کی پرائیویسی اور سکیورٹی کو مزید اہمیت دی جا رہی ہے، خاص طور پر ان افراد کے لیے جو ڈیجیٹل خطرات کا شکار ہو سکتے ہیں۔