Source : Yahoo

تحریک انصاف کی جانب سے اسپیکر پنجاب اسمبلی کیلئے پرویز الہی کا نام زیر غور
31 جولائی 2018 (18:10) 2018-07-31

اسلام آباد:پاکستان تحریک انصاف کی جانب سے پنجاب میں مضبوط اور تجربہ کار شخصیت کو اسپیکر اسمبلی لانے کا فیصلہ ، مسلم لیگ (ق)کے رہنما چوہدری پرویز الہی کا نام زیر غور ہے۔

ذرائع کے مطابق مرکز اور پنجاب میں حکومت سازی کے لیے مجموعی تعداد کا دعوی کرنے والی تحریک انصاف صوبے میں مضبوط امیدوار کو اسپیکر بنانے پر غور کر رہی ہے۔ذرائع کا کہنا تھا کہ تحریک انصاف کی سینئر قیادت مسلم لیگ (ق)کے رہنما چوہدری پرویز الہی کو اسپیکر پنجاب اسمبلی کا منصب دینے کی خواہشمند نظر آرہی ہے۔تاہم ذرائع نے بتایا کہ چوہدری پرویز الہی کی رضا مندی پر ہی انہیں اسپیکر کا منصب دیے جانے کا امکان ہے۔

خیال رہے کہ چوہدری پرویز الہی پہلے بھی پنجاب اسمبلی کے اسپیکر کا منصب سنبھال چکے ہیں۔دوسری جانب تحریک انصاف کی حریف مسلم لیگ (ن)بھی حکومت سازی کے لیے سرگرم ہے اور انہوں نے اسپیکر اور ڈپٹی اسپیکر لانے کے لیے لابنگ شروع کردی ہے۔ذرائع کا کہنا تھا کہ مسلم لیگ (ن)نے پنجاب سے 8آزاد ایم این ایز اور20 ایم پی ایز سے رابطہ کیا ہے۔ذرائع نے مزید بتایا کہ مسلم لیگ (ن)نے درخواست کی ہے کہ جن سیاسی جماعتوں اور آزاد امیدواروں نے وزیراعظم اور وزیر اعلی کے لیے تحریک اںصاف کو ووٹ دینے کا اعادہ کرلیا ہے وہ اسپیکر شپ کے لیے (ن)لیگ کی حمایت کردیں۔


ای پیپر