واٹر گیٹ سکینڈل کے صحافی اب ٹرمپ کی تفصیلات سامنے لے آگئے

31 جولائی 2018 (17:09)


نیویارک :امریکی تاریخ کے مشہور واٹر گیٹ اسکینڈل کے صحافی باب ووڈ وارڈنے اپنی نئی کتاب میں ٹرمپ کے بارے میں اہم انکشافات کئے ہیں۔


تفصیلات کے مطابق 75 سالہ امریکی صحافی باب ووڈ وارڈ نے اپنی نئی کتاب فیئر، ٹرمپ ان دی وائٹ ہائوس میں بتایا امریکی صدر ڈونلڈٹرمپ وائٹ ہائوس میں ملکی اور غیر ملکی پالیسیوں پر کس طرح فیصلے کرتے ہیں۔ باب ووڈ کی یہ 19ویں کتاب ہے ، انہوں نے 11 ستمبر کو کتاب کی رونمائی کا اعلان کیا ۔ ٹرمپ کو صدارت کے عہدے پر براجمان ہوئے اگرچہ دو سال کا عرصہ بیت گیا ، اس عرصے میں ہائی پروفائل لوگوں کی آمد کا تانتا بندھا رہا، بہت سے لوگوں کی چھٹی بھی ہوئی ، ٹرمپ کی پالیسیوں سے متعلق کئی اسکینڈلز بنے، ٹرمپ کے روس سے تعلقات وغیرہ کی تفصیلات بھی کتاب میں موجود ہیں۔


واضح رہے واٹر گیٹ سکینڈل امریکی تاریخ کا ایک ایسا واقعہ ہے کہ جس کے سبب پہلی بار ایک منتخب امریکی صدر رچرڈ نکسن کو استعفیٰ دینا پڑا۔ اور یہ سب امریکی اخبار واشنگٹن پوسٹ کے دو صحافیوں باب وڈورڈ اور کارل برن اسٹائن کی جانب سے کئے گئے اسٹنگ آپریشن کی وجہ سے ہوا۔رچرڈ نکسن امریکا کے 37ویں صدر تھے۔ان پر الزام تھا کہ انہوں نے اپنی مخالف ڈیموکریٹک پارٹی کے واٹر گیٹ کمپلیکس میں واقع دفتر میں چوری کروائی۔ صحافیوں نے انکشاف کیا کہ امریکی صدر اس چوری میں برابر کے مجرم ہیں اور ثبوت کے طور پرانہوں نے صدر نکسن کے ایک ویڈیو پیش کی جس میں وہ اپنے ایک قریبی ساتھی کے ساتھ اس معاملے پر گفتگو کررہے ہیں اور چوری کرنے والی ٹیم کو منہ نہ کھولنے کے لئے رقم دے رہے ہیں۔ یہ ایک ایسا واقعہ تھا کہ جس کے سبب تاریخ میں پہلی بار امریکہ کے منتخب صدر کو استعفیٰ دینا پڑا۔اس سکینڈل کے بارے میں بعد میں ایک فلم بھی بنی تھی جس کا نام آل دی پریذیڈنٹ مین تھا۔ اس فلم میں باب وڈورڈ اور کارل برن اسٹائن کے کردار مشہور امریکی اداکاروں رابرٹ ریڈ فورڈ اور ڈسٹن ہوفمین نے ادا کیے تھے۔

مزیدخبریں