الیکشن کمیشن نے نتائج 7 اگست تک مکمل کرنے کا اعلان کر دیا

31 جولائی 2018 (16:05)

اسلام آباد: الیکشن کمیشن آف پاکستان نے کہا ہے کہ ریٹرننگ آفیسرز نے فارم 49 پر حتمی سرکاری نتائج مرتب کر لیے جس کے بعد 7 اگست کو تمام جماعتوں کے ممبران کی کل تعداد واضح ہوجائے گی۔


الیکشن کمیشن نے انتخابات میں کامیاب ہونے والے امیدواروں کو 4اگست تک انتخابی اخراجات سے متعلق گوشوارے جمع کرانے کا حکم دیا ہے اور کہا ہے کہ کامیاب امیدواروں کا نوٹیفکیشن اخراجات کے گوشوارے موصول ہونے پر جاری کیا جائے گا۔ الیکشن کمیشن کے مطابق 4اگست تک اخراجات کے گوشوارے جمع نہ کرانے والوں کا نوٹیفکیشن روک لیا جائے گا اور نوٹیفکیشن کے بعد آزاد امیدواروں کو 3دن کے اندر کسی بھی سیاسی جماعت کا حصہ بننا ہوگا۔


الیکشن کمیشن کا کہنا ہے کہ 7 اگست کو تمام سیاسی جماعتوں کے ممبران کی کل تعداد واضح ہوجائے گی اور 8 اگست کو مخصوص نشستوں پر امیدواروں کی کامیابی کا نوٹیفکیشن جاری کیا جائے گا۔ الیکشن کمیشن کے مطابق 9 اگست تک تمام کامیاب امیدواروں کے نوٹیفکیشن جاری ہوجائیں گے جس کے بعد اسمبلیوں کے اجلاس بلائے جائیں گے اور قومی اسمبلی کے پہلے اجلاس میں اراکین حلف اٹھانے کے بعد اسپیکر اور پھر قائد ایوان (وزیراعظم) کا چنائو کریں گے۔

مزیدخبریں