علی ترین نے پی ایس ایل کی چھٹی ٹیم خریدنے کی خواہش کا اظہار کردیا
کیپشن:   فوٹو بشکریہ فیس بک
30 نومبر 2018 (12:25) 2018-11-30

لاہور: پاکستان تحریک انصاف کے سابق سیکرٹری جنرل جہانگیر ترین کے بیٹے علی ترین نے پاکستان سپر لیگ کی چھٹی ٹیم کو خریدنے کی دلچسپی ظاہر کردی ہے۔

تفصیلات کے مطابق پاکستان سپر لیگ کے گزشتہ ایڈیشن میں نئی فرنچائز ملتان سلطانز کا اضافہ ہوا تھا لیکن مالی مسائل کے سبب فرنچائز مالکان مقررہ وقت پر ادائیگیوں سے قاصر رہے جس کے بعد پی سی بی نے شون پراپرٹی بروکرز کی زیر ملکیت فرنچائز کو ملکیت سے محروم کردیا گیا اور ٹیم کے مالکانہ حقوق پی سی بی کو منتقل ہو گئے۔

اب فرنچائز کے مالکانہ حقوق کی فروخت کیلئے ٹینڈر نوٹس جاری کر کے باقاعدہ فرنچائز کو فروخت کیا جائے گا تاہم اس وقت تک ٹیم کو" چھٹی ٹیم"کے نام سے پکارا جائے گا۔ پی ایس ایل کی چھٹی ٹیم کی بولی کیلئے پاکستان کرکٹ بورڈ نے 5.2 ملین ڈالر سالانہ کی بنیادی رقم مختص کی تھی اور شون گروپ واحد فریق تھا جس نے بولی کے عمل میں حصہ لے کر فرنچائز اپنے نام کر کے اسے "ملتان سلطانز" کا نام دیا تھا۔

تاہم اب جہانگیر ترین کے صاحبزادے علی ترین نے فرنچائز کی ملکیت کے حصول میں دلچسپی ظاہر کی ہے۔ انہوں نے کہا کہ ہم فرنچائز کی فروخت کے عمل میں حصہ لیں گے اور کوشش ہو گی کہ جنوبی پنجاب میں ٹیم آئی ہے تو ہمارے ہاتھ سے نہ جائے۔

ایک سوال کے جواب میں انہوں نے کہا کہ ہم جنوبی پنجاب میں کرکٹ کے حوالے سے کافی کام کر رہے ہیں اور ہمارا پروگرام ہے کہ ہر ضلع میں ایک گراﺅنڈ اور اکیڈمی بنانے کے ساتھ ساتھ کلب کرکٹ کو سپورٹ کریں اور اگر پی ایس ایل کی ٹیم بھی آجاتی ہے تو ہمارے کام کو مزید تقویت ملے گی۔

علی ترین نے کہا کہ مجھے بچپن سے ہی کھیلوں کا شوق تھا اور سکول میں بھی کھیلوں کی سرگرمیوں میں بڑھ چڑھ کر حصہ لیتا تھا، ہمارے خاندان کا تعلق جنوبی پنجاب سے ہے تو اب ارادہ ہے کہ ملک کے اس حصے کیلئے کچھ کیا جائے۔

ٹیم کے نام کے حوالے سے سوال پر علی ترین نے کہا کہ ہم ملتان کا نام ہی برقرار رکھیں گے اور اس میں کوئی تبدیلی نہیں کریں گے۔


ای پیپر