بہروپیوں اور وفاداری بدلنے والوں سے بچیں:وزیر اعظم
25 مئی 2018 (22:05) 2018-05-25

کالاشاہ کاکو: وزیراعظم شاہد خاقان عباسی نے کہا ہے کہ ا ٓئندہ وزیراعظم اور وزیراعلیٰ پنجاب بھی مسلم لیگ )ن( کا ہی ہوگا، 100دن کا پروگرام دینے والو! یہ کام ن لیگ کرچکی ہے،جو ہوا کا رخ دیکھ کربدل جائے وہ عوام کی خدمت نہیں کرسکتے،عوام بہروپیوں اور وفاداری بدلنے والوں سے بچیں ،جو دوسروں کی عزت نہیں کرتا وہ ووٹ کی عزت کیسے کرے گا، اخلاق سے گری باتیں کرنے والے پاکستان کی سیاست نہیں کرسکتے ۔

وہ جمعہ کے روز کالاشاہ کاکو میں منعقدہ تقریب سے خطاب کررہے تھے۔ اس موقع پر جی ٹی روڈ پر امامیہ کالونی ریلوے پھاٹک اوورہیڈ برج کا سنگ بنیاد رکھا گیا۔اس موقع پر وفاقی وزیر رانا تنویر حسین، ایم این اے رانا افضال حسین، ضلعی چیئرمین رانا احمد عتیق انور،ایم پی اے پیر اشرف رسول بھی موجود تھے ۔ وزیر اعظم شاہد خاقان عباسی کا کہنا تھا کہ مسلم لیگ ن واحد جماعت اور نوازشریف واحد قیادت ہے جوپاکستان کو معاشی ترقی دے سکتی ہے۔آج گھر گھر میں بجلی ہے،دہشتگردی کا خاتمہ کردیا ہے۔ ماضی میں گھروں میں گیس کی لوڈشیڈنگ ہوتی تھی۔کنکشن نہیں ملتے تھے۔ لیکن اب کنکشن بھی لگ رہے ہیں گھروں میں گیس بھی دستیاب ہے۔یہ نوازشریف اور دعوے کرنے والوں کی سوچ میں فرق ہے۔انہوں نے کہا کہ جماعتیں بدلنے والے اپنی خدمت کرسکتے ہیں عوام کی خدمت نہیں کرسکتے۔جوکہتا میں جماعت بدل کرخدمت کروں گا اس کوجواب الیکشن میں دینا ہے۔انہوں نے کہاکہ مجھے 35سال سیاست میں ہونے کو ہیں ان کی کامیابی یہ ہے کہ انہوں نے اپنی جماعت سے وفاداری کی ہے۔

جوذراسا بھی ہوا کا رخ دیکھ کربدل جائے وہ عوام کی خدمت نہیں کرسکتے۔ جو جماعت کا وفادار نہیں وہ عوام کا وفادار بھی نہیں ہے۔مسلم لیگ) ن( نے جوترقیاتی کام ان پانچ سالوں میں کیے ہیں اس کی مثال تاریخ میں نہیں ملتے۔آج پاکستان میں سی پیک کولایا گیا۔ ہوائی اڈے بنائے گئے، سڑکوں کا جال بنایا گیا،یہ سب ن لیگ کے کام ہیں۔کل فاٹا میں ستر سالہ پرانا نظام، وہاں کے لوگ محکوم تھے۔ انہوں نے کہاکہ پاکستان کاآزادی 1947ءجبکہ ہمیں کل 2018ءمیں ملی ہے۔وزیراعظم نے کہاکہ یہ کام صرف نوازشریف نے ہی کیے ہیں۔مسلم لیگ ن ہی پاکستان کومعاشی ترقی دے سکتی ہے۔معاشی طاقت بنا سکتی ہے۔انہوں نے کہا کہ اخباروں میں پڑھا ہوگا کہ کچھ لوگ 100دن کا پروگرام دینے کی بات کررہے ہیں۔

ان کو یہ معلوم نہیں یہ وہ کام ہیں جو ن لیگ کرچکی ہے۔100دنوں والوں کی حقیقت عوام جانتی ہے۔پاکستان میں کہیں بھی جائیں کام ن لیگ کے ہی نظر آئیں گے۔۔وزیراعظم شاہد خاقان نے کہاکہ بہروپیوں اور وفاداری بدلنے والوں سے بچیں ۔ہماری سیاست وفاداری اور عزت کی سیاست ہے۔ اخلاق سے گری باتیں کرنے والے پاکستان کی سیاست نہیں کرسکتے۔جو دوسروں کی عزت نہیں کرتا وہ ووٹ کی عزت کیسے کرے گا۔اگلا وزیراعظم اور وزیراعلیٰ بھی مسلم لیگ ن کا ہی ہوگا۔انہوں نے کہاکہ آج ہم اگر ایٹمی طاقت پرناز کرتے ہیں توہم بھول گئے ہیں کہ آج سے 20سال پہلے نوازشریف ہی تھے جنہوں نے پاکستان کوایٹمی طاقت بنایا۔


ای پیپر