کوئی ایمرجنسی نہیں کہ آئی ایم ایف سے مدد مانگنی پڑے : اسد عمر
24 ستمبر 2018 (12:54) 2018-09-24

اسلام آباد: وفاقی وزیر خزانہ اسد عمر کا کہنا ہے کہ پاکستان کو ایسی کوئی ایمرجنسی کا سامنا نہیں کہ آئی ایم ایف سے مدد مانگنی پڑے ۔

ایک خصوصی انٹرویو میں وزیر خزانہ اسد عمر کا کہنا تھا ہم نے درآمدات نہیں روکیں اور نہ ہی مالیاتی پابندیاں لگائیں۔ وزیراعظم عمران خان کے حالیہ دورہ سعودی عرب کا مقصد معاہدوں کو اعلیٰ سطح پر طے کرنا اور باہمی تعلقات کو مضبوط کرنا تھا۔ اسد عمر کا کہنا تھا کہ حکومت اوورسیز پاکستانیوں کے لیے اکتوبر میں ڈالر سیونگ سرٹیفکیٹ کے اجراء پر غور کر رہی ہے۔

وزیر خزانہ کے مطابق وزیراعظم کے دورے کے دوران سعودی عرب سے تجارتی امور اور براہ راست بیرونی سرمایہ کاری پر بات کی گئی جبکہ ویزا فیس اور پاکستانی مزدوروں کو درپیش دیگر مسائل بھی زیرِ غور آئے۔انہوں نے بتایا کہ پاکستان اور سعودی عرب کے وفود میں ملاقات اکتوبر کے پہلے ہفتے میں ہو گی جس کے دوران سعودی عرب کی سرمایہ کاری کا حجم اور شعبوں کا تعین طے کر لیا جائے گا۔


ای پیپر