file photo

خوشی ہے پورا پاکستان آج ایک عید منا رہا ہے: فواد چوہدری
24 May 2020 (15:08) 2020-05-24

اسلام آباد: وفاقی وزیر سائنس اور ٹیکنالوجی فواد چوہدری نے کہا ہے کہ خوشی ہے پورا پاکستان آج ایک عید منا رہا ہے۔

وفاقی وزیر فواد چوہدری نے قوم کو عید کی مبارک باد دیتے ہوئے کہا کہ کراچی طیارہ اور کورونا کے دکھوں کے درمیان عید خوشی لائی ہے۔ انہوں نے کہا کہ خوشی ہے پورا پاکستان آج ایک عید منا رہا ہے۔ طویل عرصے بعد پسنی سے لاہور اور کراچی سے خیبر ایک لڑی میں پروئے گئے۔

فواد چوہدری نے کہا کہ یہ ہماری خواہش ہے کہ وطن سلامت اور لوگ سلامت رہے۔ اس سے قبل صدر مملکت ڈاکٹر عارف علوی، وزیر اعظم عمران خان سمیت دیگر رہنماؤں نے عوام کو عید الفطر کے موقع پر مبارک باد پیش کی تھی۔

صدر مملکت ڈاکٹر عارف علوی نے تمام اہل وطن کو عید کی مبارک باد دی۔ وزیر اعظم عمران خان نے بھی قوم کی عید الفطر کی مبارک باد پیش کی۔ وزیر اعظم نے مقبوضہ کشمیر کے مسلمانوں کو عید کی خصوصی مبارک باد دی اور کہا کہ غیر انسانی لاک ڈاؤن کے دوران کشمیریوں کا صبر اور حوصلہ قابل تعریف ہے۔

چاروں صوبوں کے گورنرز اور وزرائے اعلیٰ نے ایس او پیز کے تحت عید کی نماز ادا کی اور قوم کو عیدالفطر کی مبارک باد دی۔

وزیر خارجہ شاہ محمود قریشی نے قوم کو عید کی مبارک باد دیتے ہوئے کہا کہ بھارت کو پیغام ہے کہ ہم امن چاہتے ہیں تاہم بھارت ہماری امن کی خواہش کو کمزوری نہ سمجھے۔

وفاقی وزیر ریلوے شیخ رشید احمد نے بھی قوم کو عید کی مبارک باد دیتے ہوئے کہا کہ رمضان کے بعد ہم پر فرض ہے کہ کورونا کا مقابلہ کریں۔


ای پیپر