ہمارا مقصد پاکستان کی پبلک فنانسنگ بہتربنانا ہے : آئی ایم ایف
24 May 2019 (16:17) 2019-05-24

واشنگٹن: آئی ایم ایف کہا ہے کہ پاکستان کے ساتھ 6 ارب ڈالر پروگرام پر بات چیت مکمل ہوئی، آئی ایم ایف کا پروگرام پاکستان کی اقتصادی اصلاحات کی کوششوں میں معاون ہوگا،پروگرام کا مقصد پاکستان کی پبلک فنانسنگ بہتربنانا اورقرضوں میں کمی لانا ہے۔

آئی ایم ایف کمیونیکیشن ڈیپارٹمنٹ کے نمائندے جیری رائس نے میڈیا کو بریفنگ دیتے ہوئے کہا کہ پاکستان کے ساتھ سٹاف لیول مذاکرات 12 مئی کو مکمل ہوئے جس کے تحت پاکستان کے ساتھ 3 سال کیلئے 6 ارب ڈالرایکسٹنڈڈ فنڈ فیسلیٹی پروگرام پراسٹاف سطح کا معاہدہ ہوا، پاکستانی وزیراعظم عمران خان کی ایم ڈی آئی ایم ایف کرسٹن لیگارڈ سے ملاقات ہوئی، آئی ایم ایف مشن چیف ارنیسٹو رامریز کی جانب سے جامع اسٹیٹمنٹ جاری کی گئی۔ آئی ایم ایف کا پروگرام پاکستان کی اقتصادی اصلاحات کی کوششوں میں معاون ہوگا، پروگرام کا مقصد پاکستان کی پبلک فنانسنگ بہتربنانا اورقرضوں میں کمی لانا اورپاکستان کو پائیدارگروتھ کے راستے پرواپس لانا ہے۔

آئی ایم ایف کے مطابق توقع ہے پروگرام سے پاکستان کیلئے سماجی شعبہ کے اخراجات میں اضافہ ہوگا، سماجی شعبہ کیلئے وسائل بڑھنے سے پسماندہ طبقے کے تحفظ میں بہتری آئے گی، پروگرام سے پاکستان میں انفرا اسٹرکچراوردیگر انسانی وسائل کی ترقی میں اضافہ ہوگا۔جیری رائس نے کہا کہ پاکستان میں سماجی شعبوں کیلئے اخراجات بڑھیں گے، بنیادی ڈھانچے اور انسانی وسائل کی بہتری ممکن ہو گی ان اقدامات کے ذریعے پاکستان میں معاشی اصلاحات چاہتے ہیں۔


ای پیپر