فائل فوٹو

سرکاری ملازمت کیلئے انوکھی شرط رکھ دی گئی، قانون بھی پاس ہو گیا
23 اکتوبر 2019 (11:19) 2019-10-23

آسام: بھارتی ریاست آسام میں ایک قانون پاس ہوا ہے جس کے تحت اُن افراد کو سرکاری نوکری نہیں ملے گی جس کے دو سے زیادہ بچے ہیں۔

آسام میں برسراقتدار بی جے پی حکومت نے فیصلہ کیا ہے کہ یکم جنوری 2021 کے بعد سے دو سے زائد بچوں والے افراد سرکاری ملازمت کے اہل نہیں ہوں گے۔

آسام کے وزیراعلیٰ کے ترجمان کے مطابق یہ فیصلہ گذشتہ روز ہونے والی ریاستی کابینہ کے اجلاس میں کیا گیا جس کا مقصد ریاست میں تیزی سے بڑھتی ہوئی آبادی کو کنٹرول کرنا ہے۔

واضح رہے کہ بی جے پی کی جانب سے آسام میں 2016 میں حکومت بنائے جانے کے بعد سے آبادی میں کمی کیلئے مختلف منصوبے بنائے جارہے ہیں۔

گذشتہ دنوں آسام کی وزیر برائے صحت و تعلیم ہمانتا بسوا نے مطالبہ کیا تھا کہ دو بچوں کی پالیسی کا اطلاق انتخابی قوانین پر بھی کیا جائے اور خلاف ورزی پر ممبر اسمبلی کی رکنیت ختم کرنے کے ساتھ ساتھ اسے الیکشن میں حصہ لینے کیلئے نااہل قرار دیا جائے۔ بی جے پی حکومت کی جانب سے اس سے قبل ریاست کی آبادی کم کرنے کیلئے دیگر ہتھکنڈے بھی استعمال کیے جاتے رہے ہیں جن کا سب سے زیادہ نشانہ مسلمان بن رہے ہیں۔

یاد رہے کہ بھارت میں چاہے علاقے سے بے دخل کرنے کا معاملہ ہو یا پھر بچوں کی پیدائش پر پابندی کا فیصلہ دونوں حوالے سے مسلمان طبقہ ہی زیادہ پس رہا ہے۔ کچھ لوگوں کا کہنا ہے کہ حکومت نے یہ فیصلہ ہی اسی لیے کیا ہے تاکہ مسلمانوں کی آبادی بڑھ نہ پائے اور وہ ہمیشہ اقلیت میں رہیں۔


ای پیپر