کرونا وائرس:شاہ محمود قریشی کا جرمن وزیر خارجہ کو اہم ٹیلی فون
21 مارچ 2020 (17:00) 2020-03-21

اسلام آباد: وزیر خارجہ شاہ محمود قریشی نے کہاہے کہ کرونا وبا ،پوری دنیا کیلئے بہت بڑا چیلنج بن چکی ہے ،چیلنج سے نبرد آزما ہونے کیلئے اقوام عالم کو مشترکہ کاوشیں بروئے کار لانا ہوں گی۔ہفتہ کو وزارت خارجہ کی جانب سے جاری بیان کے مطابق وزیر خارجہ مخدوم شاہ محمود قریشی نے جرمن وزیر خارجہ ہیکو ماس سے ٹیلیفونک رابطہ کر کے جرمنی میں کرونا وائرس کے باعث ہونیوالے کثیر جانی و مالی نقصان پر اظہار تعزیت کیا ۔

وزیر خارجہ مخدوم شاہ محمود قریشی نے اپنے جرمن ہم منصب کو کرونا وبا سے نمٹنے کیلئے، پاکستان کی طرف سے اٹھائے جانے والے اقدامات سے آگاہ کیا۔ وزیر خارجہ نے کہاکہ کرونا وبا اس وقت پوری دنیا کیلئے بہت بڑا چیلنج بن چکی ہے اس چیلنج سے نبرد آزما ہونے کیلئے اقوام عالم کو مشترکہ کاوشیں بروئے کار لانا ہوں گی ۔

انہوں نے کہاکہ وزیر خارجہ نے اپنے جرمن ہم منصب کو، کرونا وبا کے تناظر میں، مقبوضہ جموں و کشمیر میں 8 ماہ سے جاری مسلسل کرفیو اور ہندوستان کی جانب سے انسانی حقوق پے در پے خلاف ورزیوں سے آگاہ کرتے ہوئے کہا کہ مقبوضہ جموں کشمیر میں صورتحال انتہائی تشویشناک ہے ۔

شاہ محمود قریشی نے کہاکہ بھارت کی جانب سے مسلسل کرفیو کے باعث ، غذا اور ادویات کی شدید قلت پیدا ہو چکی ہے۔ مخدوم شاہ محمود قریشی نے کہاکہ ہم اپنے محدود ذرائع کے ساتھ اس وبا کے پھیلاؤ کو روکنے کیلئے جدوجہد کر رہے ہیں ۔ انہوںنے کہاکہ اس وقت کرونا وائرس پوری انسانیت کیلئے ایک چیلنج بن چکا ہے انہوںنے کہاکہ ایران میں صورتحال انتہائی تشویشناک ہے ایران میں کرونا وائرس سے متاثرہ اشخاص اور اس وائرس کے سبب ہونیوالی اموات کی تعداد خطے میں سب سے زیادہ ہے اس صورت حال کے پیش نظر ضرورت اس امر کی ہے کہ ایران پر عائد معاشی پابندیوں کو فی الفور اٹھایا جائے تاکہ وہ اپنے وسائل کو بروئے کار لاتے ہوئے اس آفت کا مقابلہ کر سکیں ۔

وزیر خارجہ مخدوم شاہ محمود قریشی نے اپنے جرمن ہم منصب سے گفتگو کرتے ہوئے کہا کہ پاکستان جیسے ترقی پذیر ممالک جو قرض کے بوجھ تلے دبے ہوئے ہیں اس وقت درپیش عالمی تناظر میں ان کو قرضوں کی ادائیگی میں ریلیف فراہم کیا جائے تاکہ وہ اپنے وسائل کو اس عالمی وبا کا مقابلہ کرنے کیلئے بروئے کار لا سکیں ۔ جرمن وزیر خارجہ نے کہا کہ جرمنی میں اس وقت 20 ہزار سے زیادہ افراد کرونا انفیکشن سے متاثر ہو چکے ہیں اور اب تک 68 افراد لقمہ ء اجل بن چکے ہیں،ہمیں ایران کی صورت حال پر تشویش ہے۔

جرمن وزیر خارجہ نے وزیر خارجہ مخدوم شاہ محمود قریشی کو یقین دلایا کہ وہ قرضوں کی ادائیگی میں ریلیف اور ایران پر عائد پابندیوں کو ہٹانے کا معاملہ اگلے ہفتے منعقد ہونے والی جی 7 وزرائے خارجہ کانفرنس اور یورپین یونین فارن منسٹرز کانفرنس میں اٹھائیں گے ۔دونوں وزرائے خارجہ نے اس صورت حال پر مشاورتی سلسلہ جاری رکھنے کا فیصلہ کیا ۔


ای پیپر