امریکہ نے صحافی خشوگی کی موت پر سعودی عرب سے بڑا مطالبہ کر دیا 
20 اکتوبر 2018 (15:00) 2018-10-20

واشنگٹن :وائٹ ہاؤس نے ترکی کے شہر استنبول میں سعودی قونصل خانے میں لاپتا ہونے والے صحافی جمال خشوگی کے کیس کے حوالے سے جاری تفتیش کے بارے میں کہا ہے کہ امریکا خشوگی کیس کی فوری اور منصفانہ تحقیقات چاہتا ہے۔

تفصیلات کے مطابق سعودی عرب کی جانب سے خشوگی کیس کی ابتدائی رپورٹ جاری کیے جانے کے بعد ترجمان وائٹ ہاؤس کی طرف سے بھی رد عمل سامنے آیا ہے جس میں سعودی عرب کی تحقیقات کو مثبت قراردیا گیا ہے۔وائٹ ہاؤس کی طرف سے جاری کیے گئے بیان میں کہا گیا ہے کہ امریکا خشوگی کے کیس کی شفاف، منصفانہ اور فوری تحقیقات چاہتا ہے اور اس حوالے سے ترکی اور سعودی عرب کے ساتھ ہر ممکن تعاون کے لیے تیار ہے۔امریکا نے صحافی جمال خشوگی کے سعودی قونصل خانے میں مارے جانے پر گہرے دکھ کا بھی اظہار کیا اور مقتول کے اہل خانہ اور دوستوں سے تعزیت کی ہے۔

خیال رہے کہ سعودی عرب کے پراسیکیوٹر جنرل نے اعلان کیا ہے کہ جمال خاشقجی کو سعودی عرب کے قونصل خانے میں داخل ہونے کے بعد لڑائی جھگڑے کے دوران ماردیا گیا ہے۔ سعودی عرب جمال خاشقجی کی موت کے ذمہ دار 18 افراد سے تفیش کر رہا ہے۔ یہ تمام افراد سعودی شہری ہیں اور انہیں حراست میں لیا گیا ہے۔


ای پیپر