ایک شخص نے میری زندگی کے 8 سال ضائع کر دئیے :صبا قمر
20 May 2020 (14:54) 2020-05-20

لاہور : معروف اداکارہ صبا قمر نے انکشاف کیا کہ انہوں نے اپنی زندگی کے 8 سال ایک شخص کی وجہ سے برباد کردیے۔

تفصیلات کے مطابق اداکارہ صباقمر نے اپنے یوٹیوب چینل پر شیئر کردہ 12 منٹ اور 13 سیکنڈ پر مبنی ویڈیو میں پُرمزاح انداز میں اپنی زندگی میں پیش آنے والے واقعات اور نجی زندگی کی تلخ حقیقتوں سے دلچسپ اندازمیں پردہ اٹھایا۔ اداکارہ نے اس بات کا انکشاف کیا کہ اُن کا 8 سال کسی کے ساتھ تعلق رہا لیکن پھر اس تعلق کا بہت برا انجام ہوا۔انہوں نے کہا کہ ’بہت چھوٹی عمر سے ہی لڑکیوں کو سکھایا جاتا ہے کہ چاہے وہ مر جائیں لیکن اپنی زندگی میں آنے والے پہلے مرد کو کبھی نہیں چھوڑیں، اسی ایک جملے نے میری زندگی کے 8 سال تباہ کردیے۔

صبا قمر نے بتایا کہ اُس شخص نے ان کے ساتھ بہت برا سلوک رکھا اور پھر ایک دوسری عورت کے لیے انہیں چھوڑ دیا۔ اداکارہ نے اُس شخص کا نام لیے بغیر مزید بتایا کہ وہ مجھ سے جھوٹ بولتا تھا، برا سلوک کرتا تھا، میری تذلیل کرتا تھا اور پھر مجھ سے معافی مانگ لیتا تھا۔میرے لیے یہ تعلق اہم تھا کیوں کہ میں شادی کے حوالے سے سوچتی تھی اسی لیے 8 سال اسے قائم رکھا یہ سوچ کر کہ وہ بہتر ہوجائے گا، لیکن وہ بہتر نہیں ہوا بلکہ اس نے میرے ذہن کو تباہ کردیا۔


ای پیپر