ڈالر کے بعد سونے کی قیمتوں میں حیران کن ریکارڈ اضافہ
20 جون 2019 (23:46) 2019-06-20

لاہور :پاکستان کی بدلتی معاشی صورتحال میں غیر یقینی کیفیت نے سب کو ہلا کر رکھ دیا ہے ، ڈالر ہے تو آسمان کو چھو رہا ہے ،پٹرول کی بڑھتی قیمتوں سے مہنگائی کا سونامی آگیا ہے ،ایسے میں گزشتہ ماہ سے سونے کی قیمتوں میں اتار چڑھاﺅ نے سب کو پریشان کر کے رکھ دیا ۔

تفصیلات کے مطابق عالمی منڈی میں سونے کی قیمتوں میں حیران کن اضافے کے بعد پاکستان میں فی تولہ سونے کی قیمت میں 1800روپے کا اضافہ کر دیا گیا ، پاکستان میں روپے کی بے قدری اور ڈالر کی اونچی اڑان نے سونے کی قیمتوں کو بھی پر لگا دیئے ہیں، دوسری جانب عالمی مارکیٹ میں بھی سونے کی قیمت پروان چڑھ رہی ہیں اور ایک ہی دن میں عالمی بلین مارکیٹ میں سونے کی فی اونس قیمت میں 39 ڈالر کا اضافہ ہوگیا ہے، قیمتوں میں اضافے کے بعد اب عالمی مارکیٹ میں سونے کی فی اونس قیمت 1381 ڈالر کی بلند ترین سطح پر پہنچ گئی ہے۔

عالمی مارکیٹ میں سونے کی قیمت بڑھنے کے بعد کراچی، حیدرآباد، سکھر، ملتان، فیصل آباد، لاہور، اسلام آباد، سونے کی کی صرافہ مارکیٹوں میں بھی ایک ہی دن میں 1800 روپے کی مسافت طے کی اور تمام ریکارڈ توڑتے ہوئے فی تولہ سونے کی قیمت 77 ہزار 300 روپے کی بلند ترین سطح پر پہنچ گئی ہے، جب کہ 10 گرام سونے کی قیمت1542 روپے بڑھ کر 66 ہزار 272 روپے ہوگئی ہے۔ دوسری جانب اب چاندی کی قیمت میں اضافہ ہوگیا ہے اور فی تولہ چاندی کی قیمت 30 روپے بڑھ کر910 روپے کی سطح پر آگئی ہے۔


ای پیپر