فاسٹ بائولر محمد عامر کا کرونا ٹیسٹ ،دورہ انگلینڈ سے قبل اہم خبر
20 جولائی 2020 (19:54) 2020-07-20

لاہور:پاکستان کرکٹ بورڈ نے تصدیق کی ہے کہ گزشتہ ہفتے دوسری بیٹی کی پیدائش کے بعد فاسٹ بالر محمد عامر انگلینڈ میں قومی کرکٹ ٹیم کو جوائن کریں گے۔

علاوہ ازیں، ٹیم مینجمنٹ کی درخواست پر پی سی بی نے نیشنل ہائی پرفارمنس سنٹر میں مساجر کی ذمہ داریاں نبھانے والے محمد عمران کو انگلینڈ بھیجنے کی منظوری دیدی ہے۔پروٹوکول کے مطابق سفر کے لیے محمد عامر اور محمد عمران کی جہاز پر روانگی سے قبل ان کے کوویڈ19 کے 2 منفی ٹیسٹ آنا لازمی ہے۔

ان دونوں کا پہلا کوویڈ ٹیسٹ گزشتہ روز لیا گیا ہے۔ پہلے ٹیسٹ کی رپورٹ منفی آنے کی صورت میں انہیں لاہور کے بائیو سیکیور ماحول بھجوادیا جائے گا جہاں بدھ کو ان کا دوسرا ٹیسٹ لیا جائے گا۔ محمد عامر کے انگلینڈ میں اسکواڈ کو جوائن کرنے کی صورت میں وکٹ کیپر بیٹسمین روحیل نذیر کو اسکواڈ سے ریلیز کردیا جائے گا۔

دوسری طرف آل رائونڈر شعیب ملک کی انگلینڈ روانگی میں اگست کے دوسرے ہفتے تک تاخیر ہے کیونکہ بھارت میں 31 جولائی تک سفری پابندیوں کے باعث شعیب ملک کی فیملی ری یونین بھی تاخیر کا شکار ہے۔28 اگست سے شروع ہونے والی ٹی ٹونٹی سیریز کے لیے اسکواڈ کو جوائن کرنے والے شعیب ملک کی انگلینڈ روانگی کی صورت میں اسکواڈ سے ایک کھلاڑی کو ریلیز کردیا جائے گا۔


ای پیپر