فوٹو بشکریہ فیس بک

ریاستِ مدینہ کی پیروی کے دعویدار حکمران بتائیں سانحہ ساہیوال کا ذمہ دار کون ہے: بلاول
20 جنوری 2019 (12:48) 2019-01-20

کراچی: پیپلزپارٹی کے چیئرمین بلاول بھٹو زرداری نے ساہیوال واقعے کی شدید الفاظ میں مذمت کر دی۔ کہتے ہیں معصوم بچوں کے سامنے والدین کا قتل گڈ گورننس کے جھوٹے دعویداروں کے منہ پر طمانچہ ہے۔

بلاول بھٹو نے تحریک انصاف پر الزامات کی برسات کر دی، کہتے ہیں تحریک انصاف نے پنجاب کو پولیس اسٹیٹ میں تبدیل کردیا ہے۔ ساہیوال کا سانحہ پیغام ہے کہ نئے پاکستان میں شہری بال بچوں کے ساتھ گھروں سے باہر نہ نکلیں۔

بلاول بھٹو نے مزید کہا کہ تحریک انصاف اتنے بڑے سانحے کے بعد لاپتہ ہو گئی، ریاستِ مدینہ میں دریائے نیل کے کنارے مرنے والے کتے کی ذمہ داری خلیفہ وقت اٹھاتا تھا۔ ریاستِ مدینہ کی پیروی کے دعویدار آج کے حکمران بتائیں سانحہ ساہیوال کا ذمہ دار کون ہے۔ اہلخانہ اور وزیروں کو خوش کرنے کے لیے ایس ایس پیز اور آئی جیز کو تبادلہ کرنے سے انصاف نہیں ہوگا۔

ٹوئیٹر سرکار پر تنقید کرتے ہوئے کہا کہ اپوزیشن پر الزام تراشی کے علاوہ یہ اور کچھ نہیں کرسکتے، نیا پاکستان کے نام پر ملک میں جنگل کا قانون لاگو کردیا گیا ہے۔


ای پیپر