Photo Credit Neo Tv

وزیراعظم اور خورشید شاہ کی اہم ملاقات، نگراں وزیر اعظم سے متعلق اہم فیصلہ
18 مئی 2018 (18:13) 2018-05-18

اسلام آباد: نگراں وزیراعظم کے نام پر مشاورت کے لیے وزیراعظم شاہد خاقان عباسی اور قائد حزب اختلاف کے درمیان ملاقات میں نگراں وزیر اعظم کے نام پر اتفاق نہ ہو سکا جبکہ سید خورشید شاہ نے کہا ہے کہ وزیراعظم ملک سے باہر جا رہے ہیں، اس لئے اب وزیراعظم سے دوسری ملاقات منگل کو ہوگی،اس کے بعد حتمی نام کا اعلان کردیا جائے گا۔

جمعہ کو قومی اسمبلی میں قائد حزب اختلاف سید خورشید شاہ نے وزیراعظم کے چیمبر میں وزیراعظم شاہد خاقان عباسی سے ملاقات کی جس میں نگراں وزیر اعظم کے لیے مجوزہ ناموں پرغورکیا گیا۔ اپوزیشن لیڈر نے وزیراعظم سے ملاقات کے بعد اسپیکر قومی اسمبلی سردار ایاز صادق سے بھی ملاقات کی۔ملاقات کے بعد میڈیا سے بات کرتے ہوئے قائد حزب اختلاف سید خورشید شاہ نے کہا کہ وزیراعظم نے ملاقات کے دوران کہا کہ وہ ترکی جارہے ہیں ، نگراں وزیراعظم کے نام پر مشاورت کے لیے اتوار کو ملاقات رکھ لیتے ہیں جس کے بعد طے ہوا کہ منگل کو ایک اور ملاقات ہوگی جس میں نگراں وزیراعظم کا نام فائنل کیا جائے گا۔

اپوزیشن لیڈر نے کہا کہ وزیراعظم سے مختلف ناموں پر تبادلہ خیال ہوا ہے اور منگل کو نگراں وزیراعظم کے نام کا اعلان کردیں گے۔ وزیراعظم سے ملاقات سے قبل صحافی نے خورشید شاہ سے سوال کیا کہ پوزیشن نے اپنے ناموں کو حتمی شکل دے دی' جس پر قائد حزب اختلاف کا کہنا تھا کہ میں اور وزیراعظم شاہد خاقان عباسی نگراں وزیراعظم کے نام پر بحث کریں گے'۔


ای پیپر