کراچی ایئر پورٹ پر انور مجید اور ان کے بیٹے کی ایف آئی اے ٹیم کیساتھ تلخی
17 اگست 2018 (11:34) 2018-08-17

کراچی : اومنی گروپ کے مالک اور سابق صدر آصف علی زرداری کے قریبی دوست انور مجید اور ان کے بیٹے عبدالغنی مجید کو ایف آئی اے کی ٹیم خصوصی طیارے میں لے کر کراچی ایئرپورٹ پہنچی۔

تفصیلات کے مطابق ایئرپورٹ لاؤنج میں وفاقتی تحقیقاتی ادارے ( ایف آئی اے ) اہلکار نے عبدالغنی کو ہتھکڑی پہنانے کی کوشش کی جس پر انور مجید اورعبدالغنی نے اہلکار سے ہتھکڑی چھین کر فرش پر پھینک دی۔بعد میں دونوں کو ایف آئی اے کمرشل بینکنگ سرکل منتقل کر دیا گیا۔ آج ایف آئی اے کی جانب سے دونوں کو عدالت میں پیش کئے جانے کا امکان ہے۔ انور مجید اور ان کے صاحبزادے عبدالغنی کو اسلام آباد سے کراچی پہنچایا گیا۔

ذرائع کا کہنا ہے کہ جعلی اکاؤنٹس میں پائی جانے والی رقم 44 ارب کے شواہد مل گئے ہیں جبکہ 100 ارب سے زائد کی ترسیل کے شواہد ملنے کا امکان ہے۔جعلی اکاؤنٹس کیس میں سابق صدر آصف علی زرداری کے دوست انور مجید کے اکاؤنٹس، 12 فیکٹریاں اور شوگر ملز سیل کی جا چکی ہیں۔دونوں کو ایف آئی اے نے سپریم کورٹ سے درخواست ضمانت مسترد ہونے پرکمرہ عدالت سے گرفتار کیا تھا۔


ای پیپر