پاکستان اور انگلینڈ کے درمیان سیریز کا شیڈول سامنے آگیا
13 جون 2020 (18:02) 2020-06-13

لندن: پاکستان اور انگلینڈ کے درمیان سیریز کا مجوزہ شیڈول سامنے آگیا۔برطانوی میڈیا رپورٹس کے مطابق قومی کرکٹ ٹیم کے لیے انگلش کرکٹ بورڈ نے 26 سے 29 جون تک پرائیویٹ جیٹ کے انتظام کیا ہے، 26 جون کو جیٹ طیارہ قومی ٹیم کو لینے لاہور پہنچے گا، گرین شرٹس 27 اور 28 جون کی درمیانی رات انگلینڈ روانہ ہو گی، پاکستان کرکٹ ٹیم کے کھلاڑی برمنگھم میں 14 روز کا قرنطنیہ اورپھر پریکٹس کریں گے۔

پاکستان اور انگلینڈ کے درمیان پہلا ٹیسٹ میچ 5 اگست کو مانچسٹر میں کھیلا جائے گا، پاکستان ٹیم دوسرا، تیسرا ٹیسٹ اور ٹی ٹونٹی سیریز ساؤتھمپٹن میں کھیلے گی، ٹی ٹونٹی سیریز 28 اگست سے یکم ستمبر تک کھیلی جائے گی۔

پاکستان ٹیم کے سفری انتظامات پر 5 لاکھ پاؤنڈ کی لاگت متوقع ہے، جب کہ بند دروازوں میں کھیلی جانے والی اس سیریز سے میزبان بورڈ کو 70 سے 75 ملین پاونڈز ٹی وی رائٹس کی مد میں ملیں گے۔

مجوزہ شیڈول کے حوالے سے پی سی بی ذرائع کا کہنا ہے کہ ابھی کچھ بھی کہنا قبل از وقت ہے، میزبان بورڈ کے ساتھ جلد ٹیلی کانفرنس ہوگی جس میں دورے کی تمام تفصیلات کو حتمی شکل دی جائے گی، اور اگلے ہفتے سیریز کے شیڈول کا باقاعدہ اعلان ہوسکتا ہے۔


ای پیپر