Image Source : INP

پاکستان کو بہت جلد اس کے پیروں پر کھڑا کرینگے :فواد چوہدری
12 جنوری 2019 (16:51) 2019-01-12

جہلم:وفاقی وزیر اطلاعات فواد چوہدری نے کہا ہے کہ 2018سیاسی تکمیل کا سال تھا اور 2019معاشی تکمیل کا سال ہوگا ، جس طرح معاملات چل رہے ہیں پاکستان کو جلد اس کے پیروں پر کھڑا کریں گے ، اگر ہم نے لے دے کر پارلیمنٹ چلانی ہوتی تو عمران خان کو وزیراعظم نہ بناتے ، آصف زرداری اور نوازشریف نے کاغذی کمپنیاں بنا کر منی لانڈرنگ کی ، سات ماہ میں کسی وزیر کا کوئی کرپشن کا سکینڈل سامنے نہیں آیا۔

ہفتہ کو فواد چوہدری نے تقریب سے خطاب کرتے ہوئے کہا کہ ہم نے 2019میں عمران خان کو وزیراعظم بنا کر اپنا سیاسی سفر مکمل کیا، عمران خان کی قیادت میں پاکستان میں وہ تبدیلی آئی جو کوئی تصور نہیں کرسکتا تھا ، پاکستان میں دو خاندانوں کا مافیا تھا ، نوازشریف اور زرداری ، نوازشریف نے کاغذی کمپنیاں بنا کر منی لانڈرنگ کی جبکہ آصف زرداری نے اومنی کمپنی بنا کر منی لانڈرنگ کی۔ یہ کمپنیاں لوگوں سے کمیشن وصول کرتی تھیں ، ان کی لندن میں بے شمار جائیدادیں بنائیں ،ان لوگوں کا پاکستان سے صرف پیسوں کا رشتہ ہے .

نوازشریف کا اظہار یکجہتی کےلئے کارکنوں کو بلایا گیا لیکن 15لوگ بھی اکٹھے نہیں ہوئے ، دونوں خاندانوں نے پاکستان عوام کا پیسہ چوری کیا اور اب عوام سے مطالبہ کر رہے ہیں کہ ان کو بچانے کےلئے باہر نکالیں ۔ فواد چوہدری نے کہا کہ ٹھگز آف پاکستان عوام سے احتجاج کرنے کا مطالبہ کر رہے ہیں ، حکومت پر نوازشریف اور آصف زرداری کے احتساب کے معاملے پر بہت پریشر تھا ، اپوزیشن پارلیمنٹ کو چلنے نہیں دے رہی تھی ، عمران خان ان کی بلیک میلنگ میں نہیں آئے ، احتساب پر کوئی سودے بازی نہیں کریں گے .

نوازشریف اور آصف زرداری کی سات نسلوں نے کوئی کام نہیں کیا ، ہم نے کرپشن فری حکومت دینے کا وعدہ کیا تھا، سات ماہ میں کسی وزیر کا کوئی کرپشن کا سکینڈل سامنے نہیں آیا ، ہم نے پاکستان کو اپنے پاﺅں پر کھڑا کرنے کا وعدہ کیا تھا ، عمران خان نے کئی ملکوں کے دورے کئے جس سے تجارت بڑھی ، دسمبر میں 4.68فیصد برآمدات میں اضافہ ہوا جبکہ درآمدات میں کمی آئی ، حکومت نے تجارتی خسارہ کم کیا ہے جس سے ملک میں سرمایہ کاری کرر ہی ہے ، پانچ سال بعد ایک کروڑ سے زیادہ نوکریاں عوام کو دیں گے ، پیسے والوں پر ہاتھ ڈالا ہے جس پر وہ شور مچا رہے ہیں ، حکومت غریبوں کے حقوق کا تحفظ کرے گی اور ملک میں سرمایہ کاری کو بڑھائے گی ، اوورسیز پاکستانیوں سے مطالبہ ہے کہ رقوم قانونی طریقے سے پاکستان پہنچائیں تا کہ پاکستان کو بھی فائدہ ہو، 2018پاکستان میں سیاسی تکمیل کا سال تھا ، 2019پاکستان کی معاشی تکمیل کا سال ہوگا ۔


ای پیپر