افغان مہاجرین میں سب سے زیادہ بچے ہیں :ماہرہ خان

08 ستمبر 2018 (16:52)

پشاور:عالمی شہرت یافتہ پاکستانی اداکارہ ماہرہ خان نے اقوام متحدہ کے ہائی کمشنر برائے بحالی مہاجرین کے ساتھ افغان مہاجرین کیمپ کا دورہ کیا۔

تفصیلات کے مطابق ماہرہ خان نے گذشتہ روز نوشہرہ میں قائم ایک اور افغان مہاجرین کیمپ کا دورہ کیا ۔ دورے میں ان کے ہمراہ اقوام متحدہ کے ہائی کمشنر برائے مہاجرین فلپو گرانڈی اور دیگر اعلی حکام بھی موجود تھے۔ فلپو گرانڈی اورماہرہ خان نوشہرہ میں واقع افغان مہاجرین کے رجسٹریشن سینٹر پہنچے اور مختلف سہولیات کا جائزہ لیا۔

اداکارہ ماہرہ خان نے دورے کے دوران بات چیت کرتے ہوئے کہا میں یہاں پہلی مرتبہ آئی ہوں اور یہاں آکر بہت زیادہ خوشی ہوئی ہے۔ ماہرہ نے افغان مہاجرین کی امداد کے سلسلے میں ہر ممکن کردار ادا کرنے کا عزم کرتے ہوئے کہا کہ بے گھر لوگوں میں آدھے سے زیادہ بچے ہیں جن کے مستقبل کو سنوارنے کی ضرورت ہے۔

دوسری جانب فلپو گرانڈی نے میڈیا سے بات کرتے ہوئے کہا2 سال بعد یہاں آیا ہوں بہت خوشی ہوئی پاکستان کے بھی شکر گزار ہیں جنہوں نے طویل مدت تک افغان مہاجرین کی مہمان نوازی کی۔ افغان مہاجرین کو تعلیم و دیگر شعبوں میں مزید سہولیات کی فراہمی کی ضرورت ہے۔

مزیدخبریں