امریکہ سے علیحدہ یورپی فوج تشکیل دینے کیلئے فرانسیسی صدر نے مطالبہ کردیا
کیپشن:   فوٹوبشکریہ فیس بک
08 نومبر 2018 (10:33) 2018-11-08

پیرس: امریکہ کو فرانس نے سرخ جھنڈی دکھاتے ہوئے یورپی فوج تشکیل دینے کا مطالبہ کیا ہے تاکہ براعظم کو درپیش خطرات سے نمٹا جا سکے۔

غیرملکی میڈیا رپورٹس کے مطابق فرانس کے صدر عمانوئل میکرون نے ایک انٹرویو میں کہا تھا کہ جب تک ہم ایک حقیقی یورپی فوج کے حامل نہیں ہوتے اُس وقت تک یورپ میں رہنے والوں کی حفاظت ممکن نہیں۔ فرانس کے صدر نے روس کی جانب سے یورپ کے لیے پیدا کیے جانے والے خطرات کی جانب توجہ دلائی۔

انہوں نے اس بات کی ضرورت پر زور دیا کہ یورپ کو اس کی قدرت رکھنا چاہیے کہ وہ امریکا پر انحصار کے بغیر تن تنہا اپنا دفاع کر سکے۔ میکرون نے یورپ کے عوام میں بڑھتی ہوئی شدت پسندی اور قوم پرستی سے خبردار کیا۔

فرانس کے صدر کے مطابق آئندہ برس مئی میں ہونے والے یورپی یونین کے انتخابات میں دائیں بازو کے حلقوں کی بڑی کامیابی کا امکان ہے۔ میکرون نے زور دیا کہ اس رجحان کے خلاف مزاحمت کی ضرورت ہے۔

میکرون نے باور کرایا کہ یورپی یونین، امن اور ترقی کے واسطے ایک منصوبہ ہے جس کی مثال دنیا کی تاریخ میں نہیں ملتی۔ فرانسیسی صدر کے نزدیک حالیہ عرصے میں امریکی صدر ڈونلڈ ٹرمپ کے فیصلوں نے یورپ کی سیکیورٹی کے لیے براہ راست خطرات پیدا کر دیے ہیں۔


ای پیپر