ٹرمپ نے عالمی ادارہ صحت کے فنڈز روکنے کی دھمکی دیدی
08 اپریل 2020 (14:12) 2020-04-08

واشنگٹن: امریکی صدر ڈونلڈ ٹرمپ نے گزشتہ روز ایک پریس کانفرنس میں عالمی ادارہ صحت  کو شدید تنقید کا نشانہ بناتے ہوئے کہا کہ وہ آئندہ اس ادارے کے فنڈز روکنے پر ’’غور‘‘ کریں گے۔ قبل ازیں اس سال فروری میں بھی وہ عالمی ادارہ صحت کو امریکی فنڈنگ نصف کرنے کا خیال ظاہر کر چکے ہیں۔

 اپنی پریس کانفرنس میں ڈونلڈ ٹرمپ نے عالمی ادارہ صحت پر چین کی جانب داری کا الزام لگاتے ہوئے کہا کہ اس ادارے نے کورونا وائرس کا پھیلاؤ روکنے کے لیے فیصلوں اور عملی اقدامات میں بہت تاخیر کی جس کی وجہ سے یہ عالمی وبا سنگین ہوگئی ہے۔

واضح رہے کہ اس وقت امریکا میں کورونا وائرس سے متاثرہ افراد کی تعداد چار لاکھ سے زیادہ ہو چکی ہے جبکہ وہاں اس وبا سے تقریباً 13 ہزار افراد جان کی بازی ہار چکے ہیں۔

ٹرمپ اس سے پہلے بھی کورونا وائرس کو ’’چائنا وائرس‘‘ کہہ کر چین اور عالمی ادارہ صحت پر تنقید کر چکے ہیں۔


ای پیپر