file photo

کویتی حکومت کا تمام شہریوں کو سالانہ 50 ہزار ڈالر دینے کا پروگرام
07 اکتوبر 2020 (11:07) 2020-10-07

کویت سٹی: کویتی حکومت ایک نیا پروگرام سامنے لا رہی ہے جس کے تحت ملازمت کی عمر والے تمام شہریوں کو زندگی بھر سالانہ 50 ہزار ڈالر دیئے جائیں گے۔

غیر ملکی خبر رساں ادارے کی رپورٹ کے مطابق اس سلسلے میں کویتی حکومت کی جانب سے پروگرام کے مسودے پر کام کیا جا رہا ہے۔ اس پروگرام کا مقصد شہریوں کو سبسڈی کی مد میں دی جانے والی رقم بچانا اور دولت کی منصفانہ تقسیم قرار دیا جا رہا ہے۔

کہا جا رہا ہے کہ کویتی حکومت اگر یہ نیا پروگرام نافذ کر دیتی ہے تو وہ اس کی مدد سے معیشت کی تنظیم نو کرسکے گی اور معاشی بحران کے بھنور سے نکل جائے گی۔ اس حوالے سے ایک کویتی جریدے نے ایک رپورٹ شائع کی ہے جسے انویسٹمنٹ کنسلٹنٹ علی السلیم نے تیار کیا ہے۔

علی السلیم کا اس پروگرام بارے بتاتے ہوئے کہنا تھا کہ اس سے ناصرف دولت کی منصفانہ تقسیم ہوگی بلکہ روزگار کے مسائل کا بھی حل ہوگا۔ اس سے کویتی معیشت کو پائیدار بنانے میں مدد ملے گی جبکہ براہ راست اخراجات کا ضیاع کم ہو جائے گا۔

ان کا کہنا تھا کہ اس پروگرام کی وجہ سے حکومت مقامی شہریوں کے لیے غیرضروری آسامیاں پیدا کرنے پر مجبور نہیں ہوگی۔ مشکل یہ ہے کہ ملک میں بیورو کریسی کی وجہ سے وزارتوں کا حجم بڑھ گیا ہے۔ ملازم حد سے زیادہ ہوگئے ہیں۔ موثر اور مفید حل یہی ہے کہ پٹرول کی آمدنی کی تقسیم کا سادہ طریقہ اپنایا جائے۔


ای پیپر