سنجے دت کی پرستارنے تمام دولت کھل نائیک کے نام کر دی
07 مارچ 2018 (23:00) 2018-03-07

ممبئی:بالی وڈ کے معروف فلمی ستارے سنجے دت کی ایک پرستار نے مرنے سے پہلے اپنی تمام دولت اداکار کے نام کردی۔اپنے منفرد انداز کی وجہ سے مشہور سنجے دت کے لاکھوں پرستار ہیں۔ ممبئی کی 62 سالہ خاتون نشی ہرش چندرا بھی سنجے دت کے مداحوں میں سے ایک ہیں، جنہوں نے مرنے سے پہلے اپنی تمام جائیداد اپنے پسندیدہ اداکار کے نام کردی۔ ممبئی مرر کے مطابق 62 سالہ نشی ہرش چندرا نے ممبئی کے علاقے والکیشور کے "بینک آف برودا" میں اپنے لاکرز میں موجود تمام دولت 58 سالہ اداکار سنجے دت کے نام کردی۔

دلچسپ بات یہ ہے کہ سنجے دت کو بھی اس بات کا علم نشی ہرش چندرا کی وفات کے 2 ہفتے بعد ہوا، جب انہیں ممبئی کے ایک بینک کی جانب سے اپنی ملکیت کو حاصل کرنے کے لیے قانونی لوازمات پورے کرنے کے لیے فون کیا گیا۔ سنجے دت یہ سن کر بہت افسردہ ہوئے کہ کوئی مداح انہیں اتنا چاہتا تھا کہ انہیں بتائے بغیرساری دولت ان کے نام کر گیا۔ تاہم سنجے دت نے خاتون کی جانب سے چھوڑی گئی دولت لینے سے انکار کردیا ہے۔

ذرائع کا کہنا ہے کہ اداکار نے خاتون کیجانب سے چھوڑی گئی دولت ان کے ورثاءکو واپس کرنے کے لیے وکلاءکی خدمات حاصل کرلی ہے۔ ابھی یہ واضح نہیں ہے کہ خاتون نے سنجے دت کے نام کتنی جائیداد چھوڑی، تاہم اطلاعات ہیں کہ جس گھر میں خاتون رہائش پذیر تھیں اس کی مالیت 10 کروڑ بھارتی روپے سے زائد ہے۔


ای پیپر