ملک کا پانچ ہزار ارب روپے قرض واپس کیا ہے: فیاض الحسن چوہان
06 جولائی 2020 (21:01) 2020-07-06

لاہور: وزیرِاطلاعات پنجاب فیاض الحسن چوہان نے کہا ہے کہ حکومت سنبھالنے سے اب تک موجودہ حکومت ملک کا پانچ ہزار ارب روپے قرض واپس کرچکی ہے۔

تفصیلات کے مطابق اپنے بیان میں صوبائی وزیر اطلاعات فیاض الحسن چوہان نے کہا کہ وزیرِ اعظم عمران خان کی قیادت میں پاکستان ترقی کی نئی منازل طے کر رہا ہے،عمران خان ملک میں 15 کھرب 67 ارب کی بدعنوانی کو 270 ارب تک لے آئے ہیں،وزیراعظم کی رہنمائی میں منی لانڈرنگ کی کمر توڑ کر رکھ دی گئی ہے۔پاکستان میں ساٹھ سال کے بعد بڑے ڈیموں کی تعمیر ہو رہی ہے اور نہری نظام کو بہتر کیا جا رہا ہے،اس کے علاوہ پی ٹی آئی حکومت نے دو کھرب پینتالیس ارب کی رقوم غریب، بے روزگار اور نادار طبقے میں تقسیم کئے،ساتھ ہی ملک بھر میں آٹھ کروڑ افراد کو صحت انصاف کارڈز کے زریعے مفت علاج کی سہولت دی جا رہی ہے۔

فیاض الحسن چوہان نے کہا کہ موڈیز، ورلڈ بینک سمیت دیگر بین الاقوامی مالیاتی ادارے ہمارے معاشی استحکام کی تعریفیں کر رہے ہیں،بہتر معاشی پالیسیوں کے باعث کورونا وائرس کے باوجود برآمدات میں اضافہ ہوا ہے جبکہ پاکستان کا کرنٹ اکاؤنٹ خسارہ پہلے سے پچاسی فیصد کم جبکہ تجارتی خسارہ سینتیس ارب ڈالر سے تئیس ارب ڈالر رہ گیا ہے۔انہیں کسی ماہر میڈیکل اسپیشلسٹ سے اپنی آنکھوں اور کانوں کا علاج کرانا چاہیئے،اپوزیشن وزیرِاعظم عمران خان کی پرفارمنس پر تنقید کرنے سے پہلے تحقیق کر لیں تو بہتر ہو گا،آلِ شریف کو فضول تنقید اور بے بنیاد پراپیگنڈے کے جواب میں ہمیشہ منہ کی کھانی پڑے گی۔


ای پیپر