انتخابات کیلئے پاکستان تحریک انصاف کا آفیشل گانا جاری کر دیا گیا
06 جولائی 2018 (17:10) 2018-07-06

اسلام آباد : پاکستان تحریک انصاف کا آفیشل گانا ’اب صرف عمران خان‘ گلوکار فرحان سعید کی آواز میں ریلیز کردیا گیا ۔یہ گانا پی ٹی آئی نے اپنی انتخابی مہم 2018 کیلئے جاری کیا ہے جس میں ملک کے حالات کو اجاگر کرتے ہوئے تبدیلی کی نوید سنائی گئی ۔اس گانے میں مثبت تبدیلی کے لیے آواز اٹھانے کے عزم کا اظہار کرتے ہوئے بتایا گیا کہ بلے پہ نشان لگانے سے کرپشن کا خاتمہ ہوگا ٗ بے روزگاری ختم ہوگی اور بجلی، پانی اور دیگر مسائل حل ہوجائیں گے۔

گانے میں ملک کے نوجوانوں کو ترقی کا ضامن قرار دیتے ہوئے دعویٰ کیا گیا کہ اب نہ تو کوئی بھوکا سوئے گا اور نہ ہی تعلیم سے محروم ہوگا ٗیہ گانا 3 منٹ 48 سیکنڈز پر مشتمل ہے جسے اب تک متعدد افراد دیکھ چکے ہیں ۔چیئرمین پی ٹی آئی عمران خان نے فرحان سعید کو انتخابی مہم گانے پر خوب سراہا اور کہا کہ ہمارے نوجوان تحریک انصاف کا مرکز ہیں، اس گانے کی تیاری پر مجھے فرحان سعید پر فخر ہے جو انصاف کی تحریک کے لیے ہے۔

انہوں نے کہا کہ پی ٹی آئی ایک تصور ہے جس کا وقت آ گیا ہے۔دوسری جانب فرحان سعید نے بھی اپنے جوابی پیغام میں کپتان کا شکریہ ادا کیا۔انہوںنے کہاکہ آپ نے جو کچھ بھی کیا پاکستان اس پر شکر گزار ہے ٗ خاص طور پر جس طرح آپ نے نوجوانوں کو نئے پاکستان کی امید دی، اس کیلئے شکریہ۔


ای پیپر